Монголын Хүүхэлдэйн театрын уран бүтээлчид ОХУ-ын Эрхүү хотод болсон “Байкальский Талисман” олон улсын үндэсний театруудын III наадамд амжилттай оролцож, “Морин хуур” жүжгээрээ “Серебреной Омуль” шагналын эзэн боллоо. Энэхүү бүтээл нь Соёлын тэргүүний ажилтан Т.Энэрэлийн зохиол, СТА Б.Даваасүрэнгийн найруулгаар бүтсэн бөгөөд үндэсний өнгө аясыг хүүхэлдэйн урлагаар дамжуулан гүн сэтгэгдэлтэйгээр илэрхийлсэн нь шүүгчдээс өндөр үнэлгээ авсан байна.
“Байкальский Талисман” наадам нь ардын аман зохиол, тууль, үндэсний уран зохиолоос сэдэвлэсэн жүжгүүдийг онцолдог гэдгээрээ ялгардаг. Энэ удаагийн наадамд ОХУ, Монгол, Беларусь, Хятад, Армени зэрэг орноос 20 гаруй театрын 400 гаруй уран бүтээлч оролцож, уран бүтээлийн ур чадвар, соёлын өв уламжлалаа толилуулсан юм.
Сонирхуулбал, “Морин хуур” жүжиг нь өмнө нь “Гэгээн муза-18” олон улсын театрын наадмын хүүхэлдэйн жүжгийн төрөлд шилдгээр шалгарч байсан бөгөөд олон улсын тавцанд монгол хүүхэлдэйн урлагийг амжилттай таниулсаар байна.
Эх сурвалж: culture.gov.mn
Сэтгэгдэл (1)