Ардын жүжигчин, Соёлын элч Э.Амартүвшин дуурийн урлагийн шилдгүүдийг тодруулдаг “Opera World” цахим хуудасны жагсаалтад дэлхийд дөрөвт эрэмбэлэгдэж, Монголын урлагийн нэрийг олон улсад дахин өндөрт өргөлөө. Энэхүү жагсаалтын эхэнд ОХУ болон Германы алдарт дуурийн дуучид бичигдсэн бол Э.Амартүвшин тэдний дараа орсон нь түүний авьяас чадвар, олон улсын тайзнаа тогтмол оролцож буй өндөр амжилтыг илтгэнэ.

Э.Амартүвшин энэ зун Италийн алдарт “Арена Ди Верона” фестивалийн 102 дахь улиралд оролцох бөгөөд Вердийн “Набукко” дууриар нээлтээ хийх юм. Тэрбээр тус фестивалийн хүрээнд “Набукко” дуурьт долоон удаа, “Реголетто”-д хоёр, “Аида”-д тав, “Травиата”-д гурван удаа дуулж, дэлхийн сонгодог урлагийн хамгийн нэр хүндтэй тайзнаа дахин гарахаар болжээ.

Тэрээр 2009 оноос эхлэн сонгодог урлагт хөл тавьж, 2011 онд Монгол Улсын Гавьяат жүжигчин, 2022 онд Ардын жүжигчин цол хүртсэн. Тайзны амжилтууд нь зөвхөн дотоодын хүлээн зөвшөөрлөөр хязгаарлагдаагүй бөгөөд олон улсын нэр хүндтэй уралдаануудад дараах амжилтуудыг гаргасан:

• 2011 – П.И.Чайковскийн нэрэмжит олон улсын XIV уралдаан, II байр болон үзэгчдийн нэрэмжит шагнал

• 2012 – Пласидо Домингогийн нэрэмжит дуурийн уралдаанд түрүүлсэн

• 2013 – Франциско Винасын нэрэмжит уралдаанд дэд байр, Оросын хөгжмийн зохиолчдын бүтээл дэх шилдэг дуучны тусгай шагнал

• 2015 – “BBC Cardiff Singer of the World” уралдаанд үзэгчдийн нэрэмжит шагнал

• 2016 – “Seoul International Music Competition” уралдаанд III байр

Эдгээр амжилтаар дамжуулан тэрбээр Монголын дуурийн урлагийг дэлхийд таниулж, дараа дараагийн авьяастнуудын замыг гэрэлтүүлж байна.

Эх сурвалж: Opera World, BBC