Туркийн Истанбул хотноо зохион байгуулагдсан хэлэлцээний үеэр тохиролцсоны дагуу Орос болон Украины талууд амь үрэгдсэн цэргүүдийн цогцсыг харилцан солилцлоо. Энэ нь сүүлийн хэдэн сарын турш үргэлжилж буй хурцадмал байдал дунд болсон ховор тохиолдол бөгөөд талуудын хоорондын харилцаанд нэг алхмын ахиц гарсныг илтгэнэ.

Украины эрх баригчид Лхагва гарагт хийсэн мэдэгдэлдээ Оросын талаас нийт 1212 хүний цогцсыг шилжүүлэн авсан гэж мэдээлэв. Эдгээр нь Курск муж, Оросын мэдэлд орсон Украины Донецк, Луганск, Запорожье, Херсон зэрэг бүс нутгуудад амь үрэгдсэн цэргүүдийн цогцос байсан бөгөөд одоо хэн болохыг нь тодорхойлох ажил үргэлжилж байна.

Харин ОХУ-ын Ерөнхийлөгчийн туслах Владимир Мединскийн мэдээлснээр Оросын тал 27 цэргийн цогцсыг хүлээн авсан байна. Эдгээр солилцоо нь энэ сарын хоёрны өдөр Истанбулд болсон өндөр түвшний уулзалтаар тохиролцсон 6000 хүний цогцос солилцох хэлэлцээрийн хүрээнд хийгдэж байгаа анхны алхмуудын нэг юм.

Түүнчлэн талууд олзлогдсон цэргүүдийг харилцан солилцох ажиллагааг аль хэдийн эхлүүлсэн байна. Энэ долоо хоногийн Даваа, Мягмар гарагуудад болсон солилцоонд хүнд шархадсан байдалтай хүмүүс болон 25 нас хүрээгүй залуу цэргүүд оролцжээ.

Гэсэн хэдий ч гал зогсоох асуудал одоогоор тодорхойгүй хэвээр байна. Үүний зэрэгцээ байлдааны ажиллагаа үргэлжилж, Украины Харьков мужид мягмар гаргаас лхагва гаргийн өглөө хүртэл Оросын нисгэгчгүй онгоцнуудын дайралтад өртөж, гурван хүн амь үрэгдэж, 60 гаруй хүн шархадсан талаар Украины тал мэдээлжээ.

Эх сурвалж: BBC