Францын гоо сайхны салбарын тэргүүлэгч L’Oreal компани арьс арчилгааны чиглэлээр үйл ажиллагаа явуулдаг Британийн Medik8 компанийн мажоритар буюу олонхийн хувьцааг худалдан авахаар болжээ. Энэхүү наймааг ойрын саруудад дуусгахаар төлөвлөж байгаа ч яг ямар үнээр тохирсон нь тодорхойгүй байна. Гэхдээ Financial Times-ийн мэдээлснээр наймааны үнэ ойролцоогоор 1 тэрбум евро байх таамаг гарчээ.

2009 онд үүсгэн байгуулагдсан Medik8 компани хөгшрөлтийн эсрэг бүтээгдэхүүнээрээ танигдсан бөгөөд A амин дэм агуулсан Crystal Retinal 6 зэрэг бүтээгдэхүүн нь түгээмэл. 2021 онд энэхүү компанийн хувьцааг Inflexion нэртэй хөрөнгө оруулалтын сан худалдан авч, Америкийн зах зээлд амжилттай гаргахад нь тусалсан байна.

L’Oreal наймааг амжилттай хаасны дараа Medik8 компанид миноритар буюу цөөнхийн хувьцаатай хэвээр үлдэнэ. Харин компанийн үүсгэн байгуулагч Эллиот Айзекс зөвлөхийн үүрэгтэйгээр компанид байр сууриа хадгалан үлдэх юм.

L’Oreal компанийн зүгээс энэ худалдан авалт нь тэдний люкс ангиллын арьс арчилгааны сегмент дэх байр суурийг бататгаж, брэндийн бүтээгдэхүүний чанарыг шинэ түвшинд гаргана хэмээн мэдэгдсэн байна. Оны эхнээс тус компанийн хөрөнгөжилт 11 хувиар өсөөд байна.

Эх сурвалж: Officelife.media, Bloomberg, Financial Times.