/Yonhap/ агентлагийн мэдээлснээр, Умард Солонгос пүрэв гарагт хилийн дагуу байрлуулсан чанга яригчаар Өмнөд Солонгосын эсрэг суртал ухуулгын нэвтрүүлэг дамжуулах үйл ажиллагаагаа түр зогсоосон бололтой гэж Өмнөд Солонгосын цэргийнхэн мэдэгджээ.

Энэ нь Өмнөд Солонгосын Засгийн газар бүтэн жилийн турш үргэлжилсэн Пёньяныг эсэргүүцсэн суртал ухуулгын нэвтрүүлгээ зогсоосны дараахан бүртгэгдсэн анхны өөрчлөлт боллоо. Тодруулбал, Өмнөд Солонгосын Ерөнхийлөгч Ли Жэ Мён лхагва гарагт хурцадмал байдлыг намжаах, итгэлцлийг сэргээх зорилгоор чанга яригчаар нэвтрүүлэг дамжуулахаа зогсоох тушаал өгсөн юм.

Умард Солонгосын талаас явуулж буй чанга яригчийн сүүлчийн дамжуулалтыг лхагва гаргийн орой сонссон тухай нэрээ нууцалсан Өмнөд Солонгосын цэргийн алба хаагч мэдэгдсэн байна. Харин пүрэв гарагт ийм дамжуулалт бүртгэгдээгүй гэж Өмнөд Солонгосын Штабуудын дарга нарын нэгдсэн хороо мэдээлж, Умардын үйл ажиллагааг цаашид анхааралтай ажиглах болно гэж мэдэгдсэн байна.

Хоёр Солонгосын харилцаа сүүлийн үед дахин хурцдаж, харилцан чанга яригчаар нэвтрүүлэг явуулах, суртал ухуулгын материалыг агаарын бөмбөлгөөр хаях зэрэг үйлдлүүд эргэн идэвхжиж байсан юм. Харин энэ удаагийн хоёр талын зэрэгцээ ухралт нь цаашид харилцан итгэлцэл, яриа хэлэлцээг сэргээх эхлэл байж болзошгүй нөхцөлийг бүрдүүлж байна.

Эх сурвалж: Yonhap News Agency