Сербийн Ерөнхийлөгч Александр Вучич Украинд дайн эхэлснээс хойш анх удаа тус улсад албан ёсны айлчлал хийлээ. Тэрээр “Украин-Зүүн Өмнөд Европ” дээд хэмжээний уулзалтад оролцохоор урьдчилан зарлаагүй айлчлал хийж, нэг өдөр саатсан байна гэж Сербийн Ерөнхийлөгчийн засаг захиргаа мэдээлжээ.

Уулзалтын үеэр Ерөнхийлөгч Вучич “украинчуудыг дэмжиж байгаагаа тодорхой харуулахын тулд” Серби улс Украины нэг эсвэл хоёр хот, бүс нутгийг сэргээн босгоход оролцоход бэлэн гэдгээ илэрхийлжээ. Түүнчлэн Украины газар нутгийн бүрэн бүтэн байдлыг хамгаалах хүчин чармайлтыг дэмжиж байгаагаа мэдэгдсэн нь тус улсын дайнтай холбоотой олон улсын байр сууринд тодорхой дохио болж байна.

Уг дээд хэмжээний уулзалт нь Одесса хотод зохиогдсон бөгөөд Хар тэнгисийн аюулгүй байдал зэрэг бүс нутгийн асуудлыг хэлэлцэх зорилготой байв. Уулзалтад Молдова улсын Ерөнхийлөгч Майя Санду, Грекийн Ерөнхий сайд Кириакос Мицотакис, Хорватын Засгийн газрын тэргүүн Андрей Пленкович зэрэг улс орнуудын удирдагчид оролцжээ. Мөн Румыний Ерөнхийлөгч Никушор Дан сонгуульд ялснаасаа хойш анх удаа Украинд ирсэн байна.

А.Вучичийн айлчлал анхаарал татсан шалтгаан нь Серби улс дайны турш төвийг сахисан байр суурь баримталж ирсэнтэй холбоотой юм. Серби нь Европын Холбооны гишүүнээр элсэх нэр дэвшигч улсын хувьд Украины газар нутгийг өөртөө нэгтгэх ОХУ-ын үйлдлийг хүлээн зөвшөөрдөггүй ч, Оросыг шүүмжлэх, хориг тавих алхмуудаас зайлсхийж ирсэн түүхтэй. Гэсэн ч энэ удаагийн уулзалтад оролцсон нь барууны орнуудтай харилцаагаа ойртуулах оролдлого гэж ажиглагчид үзэж байна.

А.Вучич энэ оны тавдугаар сард ОХУ-д айлчилж, Дэлхийн Хоёрдугаар дайнд ялсны 80 жилийн ойд зориулсан үйл ажиллагаанд оролцсон нь Европын Холбооны удирдлагуудын шүүмжлэл дагуулсан билээ.

Нөгөөтэйгүүр, “The Financial Times” сонинд дурдсанаар, 2024 оны зургадугаар сарын байдлаар Серби улс гуравдагч орны дамжуулалтаар Украинд 8 тэрбум еврогийн зэвсэг нийлүүлсэн гэж мэдээлжээ. Ерөнхийлөгч Вучич уг мэдээллийг “ерөнхийд нь үнэн” хэмээн хүлээн зөвшөөрсөн бөгөөд зэвсгийн экспорт нь тус улсын эдийн засгийг сэргээх арга хэмжээний нэг хэсэг гэж тайлбарласан байна.

Гэсэн ч Оросын эрх баригчид Сербийг зэвсэг нийлүүлсээр байна гэж мэдэгдсэний дараа Вучич энэ төрлийн гэрээ хэлцлийг зогсооно гэж амласан ажээ.

Эх сурвалж: DW, The Financial Times.