Олон улсын хөдөлмөрийн байгууллагаас жил бүрийн зургаадугаар сарын 12-ныг Хүүхдийн хөдөлмөрийн эсрэг дэлхийн өдөр болгон тэмдэглэж ирсэн бөгөөд энэ жил “Хүүхдийн хөдөлмөрийг устгахад ахиц гарсан ч ахиад урагшлахад хүчээ нэмье” уриаг дэвшүүлж байна. Уг уриа нь дэлхий даяар хүүхдийн эрхийг хамгаалах, хөдөлмөрийн мөлжлөгөөс урьдчилан сэргийлэхэд илүүтэй анхаарах шаардлагыг дахин сануулж буй үйлдэл юм.

Монгол Улсын хэмжээнд 150 мянга гаруй хүүхэд хөдөлмөр эрхэлдэг гэсэн тоон мэдээг Үндэсний статистикийн хорооноос гаргажээ. Тэдгээрээс 58 мянга орчим хүүхэд нь хүнд, аюултай, эрүүл мэндэд нь сөрөг нөлөөтэй, тэвчишгүй орчинд ажил хөдөлмөр эрхэлж байгаа нь нийгмийн анхаарлыг хандуулах ноцтой асуудал хэвээр байгааг харуулж байна.

Хүүхдийн хөдөлмөрийг устгахын тулд хууль эрх зүйн хүрээнд тодорхой алхмуудыг хийж эхэлжээ. Тухайлбал, Монгол Улсын Хөдөлмөрийн тухай хуулийн шинэчилсэн найруулгад ОУХБ-ын суурь конвенцын үзэл баримтлалыг тусгаж, хэрэгжилтийг хангах арга хэмжээ авсаар байна. Мөн хүүхдийн эрхийн улсын байцаагчдын тоог нэмэгдүүлэхээр төлөвлөж байгаа бөгөөд өнөөдрийн байдлаар 38 байцаагч ажиллаж байгаа бол ирэх онд энэ тоог 92 болгож нэмэгдүүлэх зорилт тавиад байна.

Хүүхдийн хөдөлмөрийг таслан зогсоохын тулд зөвхөн төрийн байгууллагуудын бус, эцэг эхчүүд, иргэний нийгэм, сургууль, хэвлэл мэдээлэл зэрэг бүх түвшний оролцоо, хариуцлага зайлшгүй хэрэгтэй бөгөөд хүүхэд бүр сурч боловсрох, хөгжих, тоглох эрхтэй гэдгийг сануулсан өдөр болж байна.

Эх сурвалж: Үндэсний статистикийн хороо.