Австрийн хоёр дахь том хот болох Грацийн оршин суугчид цочирдол, гуниг, итгэл үл хүрэх мэдрэмж дунд байна. Учир нь тус улсад орчин үеийн түүхэнд тохиосон хамгийн харгис буудалцаан болж, нийт 11 хүн амиа алдсан бөгөөд тэдний дотор буудагч өөрөө багтаж байна.

Энэ аймшигт хэрэг 2024 оны зургадугаар сарын 11-ний мягмар гарагийн өглөө 10:00 цагийн орчимд Драйершүценгасс дахь дунд сургуульд гарчээ. Тус сургууль нь Грацийн гол вокзалын ойролцоо байрладаг. Энгийн өглөө шиг эхэлсэн хичээлтэй зэрэгцэн, тус сургуулийн хуучин сурагч 21 настай залуу хоёр галт зэвсэгтэйгээр сургуулийн байранд халдан орсон байна. Тэрээр хичээлээ төгсөж чадаагүй, дээрэлхүүлж байсан гэж мэдүүлсэн нь сэтгэлзүйн шалтгаантай байсныг илтгэж байна.

Цагдаа нар 17 минутын дараа нөхцөл байдлыг хяналтдаа авч чадсан ч аль хэдийн долоон эмэгтэй, гурван эрэгтэй хүн буудлагын улмаас амиа алджээ. Үүний дараа нэг эмэгтэй эмнэлэгт хүргэгдсэн ч нас барсан байна. Олон хүн одоо ч эмнэлэгт байгаа ба заримынх нь биеийн байдал хүнд байгаа аж.

Буудсан этгээд өөрийгөө газар дээр нь хороосон бөгөөд хоёр галт зэвсэгтэй байсан. Тэрээр ямар ч гэмт хэрэгт холбогдож байгаагүй, хууль ёсны дагуу зэвсгээ эзэмшдэг байсан ба нэг бууг хэргийг үйлдэхийн өмнөх өдөр худалдан авсан талаар мэдээлж байна.

Орон нутгийн оршин суугч Река “Манай энэ дүүрэг тун тайван, аюулгүй, амьдрахад сайхан газар. Ийм аймшигт зүйл тохиолдоно гэж хэзээ ч бодож байсангүй. Энэ бол бүхэл бүтэн хотын хувьд гунигт өдөр” хэмээн сэтгүүлчдэд ярьжээ.

Австрийн Ерөнхийлөгч Александер Ван дер Беллен мэдэгдэлдээ:
“Энэ бол үгээр илэрхийлэхийн аргагүй аймшиг. Грацийн сургуулийн энэ хэрэг улс орныг маань зүрх рүү нь сүлбэсэнтэй адил. Ирээдүйгээ мөрөөдсөн залуус, тэднийг чиглүүлж байсан багш байлаа. Гэр бүл, найз нөхөд, дотны хүмүүсийн мэдэрч буй энэ их өвдөлтийг хөнгөвчлөх зүйл одоогоор үгүй” гэж хэлжээ.

Австрийн Канцлер Кристиан Штокер болон Дотоод хэргийн сайд Герхард Карнер нар хэрэг гарсан даруйд Грац хотод очиж, үүнийг “үндэсний хэмжээний эмгэнэл” хэмээн тодорхойлов. Мөн тэрээр “Австрийн бүх ард иргэд хамтдаа уй гашуу, харамслыг мэдэрч байна” хэмээн онцолжээ.

Австрид гурван өдрийн гашуудал зарласан бөгөөд Ерөнхийлөгчийн ордон байрладаг Вена хотын Хофбург ордон дээр төрийн далбааг хагас буулгажээ.

Австри бол Европт хамгийн зэвсэгжсэн иргэдтэй улсуудын нэг бөгөөд 100 хүн тутамд 30 галт зэвсэг ногддог гэж Small Arms Survey мэдээлдэг. Гэсэн хэдий ч сургууль руу халдсан хэрэг бараг гарч байгаагүй. Сүүлийн хэдэн арван жилийн турш:

• 2018 онд Мистелбах хотод 19 настай хөвгүүнийг өөр нэг өсвөр насны залуу буудсан;

• 2012 онд Санкт Пөлтенд сурагчийг эцэг нь буудсан;

• 1997 онд Зөбэрнд 15 настай сурагч багшийгаа буудаж амь насыг нь хороосон;

• 1993 онд Хаусляйтенд 13 настай хүү сургуулийн захирлыг шархдуулж, дараа нь өөрийгөө хороосон байна.

Сүүлийн жилүүдийн хамгийн ноцтой буудлагын хэрэг нь 2020 оны арваннэгдүгээр сард Вена хотын төвд гарч, 4 хүний амь эрсдэж, 22 хүн шархадсан юм. Тус хэрэгт исламын туйлширсан этгээд буруутай гэж тогтоогдсон.

Австрид автомат болон шахалттай бууг хориглодог бол револьвер, гар буу, хагас автомат зэвсгийг зөвхөн тусгай зөвшөөрлөөр эзэмшихийг зөвшөөрдөг. Харин ангийн болон спорт бууны хувьд зэвсгийн эсвэл ан агнуурын үнэмлэх шаардлагатай.

Грацийн буудагчийн хоёр ч зэвсэг хууль ёсны байсан бөгөөд тэрээр ямар ч гэмт хэрэгт холбогдож байгаагүй байна.

Сургуулийн гадна дугуйтай нэгэн залуу цагдаагийн хамгаалалтын шугамын цаанаас харж зогсож байжээ. Тэрээр сэтгүүлчид рүү хандан:
"Энэ бол аймшиг. Энэ бол миний төрж өссөн газар. Надтай адилхан насны олон хүн энд амиа алдсан гэдэгт итгэж ч чадахгүй байна. Ийм зүйл бидэнд тохиолдох ёсгүй байсан юм” хэмээн ярьжээ.

Эх сурвалж: BBC News