АНУ-ын Калифорни мужийн Лос-Анжелес хотод цагаачдыг баривчлах ажиллагааг эсэргүүцсэн жагсаал эрчимжиж байгаа учраас Тэнгисийн явган цэргийн 700 алба хаагчийг тус хотод нэмж байрлуулахаар шийдвэрлэсэн тухай Батлан хамгаалахын яам мэдээлжээ. Жагсаал өнгөрсөн баасан гарагт эхэлсэн бөгөөд хот даяар АНУ-ын Цагаачлал, гаалийн хяналтын албаны /ICE/ ажиллагаанд дургүйцсэн иргэдийн эсэргүүцэл үргэлжилж байна.
Ерөнхийлөгч Дональд Трамп өмнө нь Лос-Анжелес руу Үндэсний гвардийн 2000 цэргийг илгээсэн нь олон нийтийн дургүйцлийг өдөөж, улс төрийн маргаан үүсгээд байна. Хотын захирагч Карен Басс, мужийн захирагч Гэвин Ньюсом нар эсэргүүцлийн жагсаалыг цагдаа нар өөрсдийн хүчээр зохицуулж чадна хэмээн байр сууриа илэрхийлсэн. Гэвч нөхцөл байдал улам даамжирч болзошгүй байгаа тул Ерөнхийлөгч дахин 2000 цэрэг илгээхээр төлөвлөж буй тухай мэдээлэл Калифорнийн удирдлагад иржээ.
Үүний хариуд захирагч Г.Ньюсом холбооны засгийн газрыг шүүхэд өгсөн бөгөөд Үндэсний гвардийн хүчийг мужийн засаг захиргааны зөвшөөрөлгүйгээр илгээж буй нь эрх мэдлийн хуваарилалтад сөргөөр нөлөөлж буйг онцолжээ.
АНУ-ын зэвсэгт хүчнийхэн дотоодын хууль сахиулах ажиллагаанд оролцох нь туйлын ховор тохиолдол бөгөөд энэ удаагийн шийдвэр нь эрх баригчдын хоорондын маргаан, нийгмийн сөргөлдөөнийг улам нэмэгдүүлэх шинжтэй байна.
Эх сурвалж: BBC
