“Монгол Улсад эмчлэгдэх боломжгүй өвчлөлийг бууруулах” бодлогын хүрээнд Улсын Нэгдүгээр Төв эмнэлэг (УНТЭ) тархи, нугасны гүний болон төвөгтэй байрлалтай хавдар, хавдар төст эмгэгүүдийн мэс заслын эмчилгээг бүрэн нутагшуулахаар ажиллаж эхэлжээ. Энэ хүрээнд Бүгд Найрамдах Турк Улсын КОЧ их сургуулийн эмнэлэг, Американ эмнэлэгүүдэд мэс заслын эмч, мэргэжилтнүүдийг сургаж мэргэшүүлсэн байна.

Сургалт төгссөн багийн бүрэлдэхүүн эх орондоо:

• тархины ховдлын хавдар – 5 тохиолдол,

• таламус болон суурийн зангилааны хавдар – 7 тохиолдол,

• өнчин тархины (гипофизийн) хавдар – 6 тохиолдолд,
  нийтдээ тархины гүний бүтэц дэх 18 хавдарт амжилттай мэс засал хийжээ.

Өнөөдөр дээрх мэс заслыг үргэлжлүүлэн хөгжүүлэхэд шаардлагатай технологийг УНТЭ-д хүлээлгэн өгсөн нь оношилгоо, эмчилгээний чанарыг шинэ түвшинд хүргэх нэг чухал алхам боллоо. Тархины гүний бүтцэд хүрэх мэс засал нь нарийн төвөгтэй, өндөр эрсдэлтэй үйлдэл боловч орчин үеийн тоног төхөөрөмжийн тусламжтайгаар үүнийг илүү найдвартай, үр дүнтэй гүйцэтгэх боломж бүрдэж байна.

Тус эмнэлгийн удирдлагуудын онцолсноор, цаашид гүний байрлалтай тархины хавдрын мэс заслыг улам боловсронгуй болгож, өндөр хөгжсөн орнуудын түвшинд хүргэх зорилгоор аргачлал, ур чадварыг шат дараатай сайжруулах, шинэчлэл хийх ажлууд үргэлжлэх юм.

Эх сурвалж: УНТЭ, Эрүүл мэндийн яам