Соёл, спорт, аялал жуулчлал, залуучуудын яамны дэмжлэгтэйгээр Улсын дуурь бүжгийн эрдмийн театрын санаачлан зохион байгуулж буй Австрийн соёлын форумын хүрээнд дэлхийн нэрт хөгжмийн удирдаач, төгөлдөр хуурч Маттиас Флецыбергер энэ өдрүүдэд Монгол Улсад ажиллаж байна.

Тэрбээр өнгөрсөн өдрүүдэд УДБЭТ-ын гоцлол болон найрал дуучдад зориулсан мастер класс сургалт явуулсан бөгөөд тавдугаар сарын 25-нд болох “Сонгодог үдэш” тоглолтыг удирдахаар бэлтгэл хангаж байгаа юм. Тоглолтод дэлхийн сонгодог хөгжмийн бүтээлүүдийг Монголын уран бүтээлчидтэй хамтран тайзнаа толилуулах аж.

Венад төрж өссөн Маттиас Флецыбергер таван настайгаасаа эхлэн төгөлдөр хуурын сургалтанд хамрагдаж, Вена хотын урлагийн сургуульд суралцсан байна. Тэрээр дэлхийн өндөр зэрэглэлийн уралдаанд олонтаа амжилт гаргасан төдийгүй концерт, дуурь, симфонийн бүтээлийг Вена болон олон улсын тайзнаа удирдаж ирсэн туршлагатай. Чех, АНУ, Канад, Болгар, Швейцар, БНСУ, Япон, БНХАУ зэрэг орнуудын нэр хүндтэй театрт ажиллаж байжээ.

Флецыбергер Монголд анх 2015 онд ирж, УДБЭТ-ын симфони найрал хөгжимчид, дуурийн дуучидтай хамтран ажиллаж байсан бол энэ удаагийн айлчлал нь Австрийн Ерөнхийлөгчийн айлчлалыг угтсан соёлын арга хэмжээний нэг хэсэг юм. Тэрээр Австрийн Ерөнхийлөгчийн Тамгын газрын Соёлын зөвлөх, мөн БНХАУ-д суугаа Австрийн Элчин сайдын яамны Соёлын консул хатагтай Гүдрүн Хардиман Поллроссын урилгаар хоёр дахь удаагаа Монголд айлчлан, УДБЭТ, Улсын филармони, Монгол Улсын консерваторийн уран бүтээлчидтэй хамтран ажиллаж байна.

Эх сурвалж: УДБЭТ