Цаг уур, орчны шинжилгээний газраас мэдээлснээр тавдугаар сарын 21-23-ны өдрүүдэд Алтай, Хангайн уулархаг бүс болон говийн нутгийн баруун хэсгээр бороо орох төлөвтэй байна. Өнөөдөр буюу тавдугаар сарын 21-ний 08:00–20:00 цагийн хооронд нутгийн баруун хагаст үүлэрхэг, зарим газраар бороо орно. Харин бусад нутгаар бороо орохгүй, солигдмол үүлтэй байх аж.

Салхины хувьд Алтайн уулархаг нутаг болон Арц Богдын өвөр хоолойд секундэд 13-15 метр хүрч ширүүсэх төлөвтэй байгаа бол бусад нутгаар 6-11 метрийн хүчтэй сэвшээ салхи үргэлжилнэ. Агаарын хэмийн хувьд Хангай, Алтайн өндөрлөгт 7-12 хэм, говийн зүүн өмнөд хэсэг болон Орхон-Сэлэнгийн сав газарт 20-25 хэмийн дулаан бүртгэгдэх бөгөөд нийслэлийн орчимд 17-19 хэм дулаан, бороо орохгүй байх төлөвтэй байна.

Харин ирэх өдрүүдэд буюу 22-26-ны хооронд зарим нутгаар бороо, нойтон цас орох хандлагатай. Ялангуяа 23-нд Хөвсгөл, Хангай, говийн баруун хэсгээр, 24-нд төв болон говийн зарим нутгаар, 25-нд баруун аймгуудын нутгаар хур тунадас орохыг анхаарууллаа.

Салхи ихэнх нутгаар 5-10 м/с үлээх ба Дархадын хотгор, Тэс, Идэр, Тэрэлж, Хэнтийн уулархаг нутгаар шөнөдөө 2 хэм хүйтнээс 3 хэм дулаан, өдөртөө 12-17 хэм дулаан байх бол говийн өмнөд хэсэг, Их нууруудын хотгорт өдөртөө 30 хэм хүрч хална.

Эх сурвалж: Цаг уур, орчны шинжилгээний газар