Цаг уурчдын мэдээлснээр тавдугаар сарын 15-наас эхлэн Хангайн уулархаг нутгаар бороо, нойтон цас орж, говь, талын нутгаар салхи шуургатай байхыг малчид, иргэд, тээвэрчдэд анхааруулж байна. 15, 16-ны өдрүүдэд салхи Алтайн салбар уулс болон говийн бүс нутгаар секундэд 18–20 метр хүрч ширүүсэх төлөвтэй байна.
Өнөөдөр буюу 14-ний өдөр ихэнх нутгаар солигдмол үүлтэй, баруун болон төвийн нутгийн зарим газраар бороо орно. Бусад нутгаар бороо орохгүй. Салхи баруун өмнөөс 6–11 м/с, зарим газраар 14–16 м/с хүртэл ширүүсэх төлөвтэй.
Өдөртөө Хангай, Хөвсгөл, Завхан, Тэсийн хөндийд 9–14 хэм, Хэнтий, Туул, Тэрэлжийн сав газраар 14–19 хэм, говийн өмнөд хэсэгт 25–30 хэм, бусад нутгаар 20–25 хэм дулаан байна. Улаанбаатар орчмоор үүлшинэ, бороо орохгүй, 17–19 хэм дулаан байна.
Цаашдын тав хоногт буюу тавдугаар сарын 15–19-ний хооронд:
-
15-нд төв, говийн нутгийн зарим хэсгээр бороо, нойтон цас,
-
16-нд зүүн болон говийн нутгийн ихэнх хэсгээр,
-
17, 18-нд Увс нуурын хотгор, Хангай, Хөвсгөл, Хэнтийн уулархаг нутгаар цас орох төлөвтэй.
Мөн энэ өдрүүдэд шөнийн температур зарим нутгаар 3–8 хэм хүйтэн байж болзошгүйг анхааруулж байна.
Эх сурвалж: Цаг уур, орчны шинжилгээний газар
