Гадаад харилцааны сайд Б.Батцэцэг өнөөдөр БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жин Воныг ГХЯ-нд хүлээн авч уулзав. Уулзалтаар хоёр улсын иргэдийн харилцан зорчих нөхцөлийг сайжруулах, визийн хүндрэлтэй асуудлыг шийдвэрлэх талаар дэлгэрэнгүй санал солилцлоо.

Сайд Б.Батцэцэг өмнө нь БНСУ-ын талд удаа дараа тавьж ирсэн хэдий ч шийдвэрлэгдээгүй дараах асуудлуудыг дахин хөндөн тавив:

• Хүчин төгөлдөр визтэй монгол иргэдийг БНСУ-ын хилийн шалган нэвтрүүлэх албаныхан шалтгаангүйгээр саатуулж, хувийн мэдээлэлд халдан, албадан буцааж байгааг зогсоох;

• Визний татгалзсан хариу авсан иргэдийг 6 сарын хугацаанд дахин виз мэдүүлэх боломжгүй байдалд оруулдаг зохицуулалтыг цуцлах;

• Виз мэдүүлэхэд шаардлагатай гадаад паспортыг заавал хураах бус, нотариатаар баталгаажуулсан хуулбар эсвэл E-Mongolia системийн лавлагаа ашиглах нөхцөл бүрдүүлэх;

• Визний мэдүүлгийн үйл явцыг цахим хэлбэрт шилжүүлж, иргэдэд цахимаар виз олгох боломжийг судалж үзэх;

• Харилцан адил байх зарчмаар БНСУ руу эмчилгээний зорилгоор зорчих иргэд, тэдний асран хамгаалагчийг 30 хоногийн хугацаанд визийн шаардлагаас чөлөөлөх, олон удаагийн визийн тоог нэмэгдүүлэх.

Монгол Улс 2025 оныг дуустал БНСУ-ын иргэдийг визгүй зорчуулах шийдвэр гаргасан. Иймд энэхүү шийдвэртэй уялдуулан харилцан тэгш зарчмыг хэрэгжүүлэх нь зүйтэй гэж Монголын тал үзэж буйг сайд Б.Батцэцэг онцоллоо.

Түүнчлэн тэрбээр Монгол, БНСУ-ын стратегийн түншлэлийн харилцааг улам бэхжүүлэхэд иргэдийн солилцоо, чөлөөтэй зорчих нөхцөл чухал болохыг тодотгож, албан ёсны ноот бичгээр хүсэлт хүргүүлснээ дурдлаа.

Элчин сайд Чой Жин Вон монгол иргэдэд виз мэдүүлэхэд тулгарч буй хүндрэлүүдийг ойлгож байгаагаа илэрхийлээд, дээрх асуудлуудыг нарийвчлан судалж, Монголын талтай үргэлжлүүлэн зөвшилцөж, хамтран ажиллана гэж мэдэгджээ.

Эх сурвалж: Гадаад харилцааны яам