Улсын драмын эрдмийн театр “Тэнгэрийн хүү” түүхэн туульсын жүжгийг энэ сарын 4-6-нд тайзнаа тавина. Эдгээр тоглолтууд Унгар улсад болох Мадач олон улсын театрын 12 дахь удаагийн наадамд оролцохын өмнөх бэлтгэл ажлын хүрээнд тавигдах юм байна.
Тасалбарыг энд дарж захиалах боломжтой.
Ташрамд дурдахад, Улсын драмын эрдмийн театрын уран бүтээлчид 2025 оны дөрөвдүгээр сард Унгар улсын Будапешт хотноо болох Мадач олон улсын театрын 12 дахь удаагийн наадамд Б.Цогнэмэхийн зохиол, найруулагч Төрийн соёрхолт, Урлагийн гавьяат зүтгэлтэн Н.Наранбаатарын найруулга “Тэнгэрийн хүү” түүхэн туульсын жүжгээр оролцоно.
Энэхүү наадам нь дэлхийн 30 гаруй орны театрын уран бүтээлчдийг нэгтгэн, өөрсдийн бүтээлээ танилцуулах боломж олгодог, театрын хөгжлийн чиг хандлага, улс хоорондын соёлын харилцааг бэхжүүлэх зорилготой томоохон наадам юм.
2025 онд Монгол Улс, Унгар Улсын хооронд дипломат харилцаа тогтоосны 75 жилийн ой тохиож байгаа бөгөөд энэ хүрээнд “Тэнгэрийн хүү” жүжгийг “Go Mongolia” уриан дор тоглож, хоёр орны соёлын харилцааг өргөжүүлэхээр төлөвлөжээ.
Тоглолтын хуваарь:
Дөрөвдүгээр сарын 25-нд 19:00 PM
Дөрөвдүгээр сарын 26 -нд 19:00 PM
National Theatre, Budapest
