Боловсролын яамны дэмжлэгтэйгээр Боловсролын ерөнхий газар болон “Хилийн чанад дахь Монголчуудын зөвлөл” НҮТББ хамтран гадаадад амьдарч буй монгол иргэд, хүүхдүүдэд эх хэл, бичиг үсэг сурах, үндэсний түүх, соёл, өв уламжлал, зан заншлыг түгээн дэлгэрүүлэх зорилготой “Монгол хэл, бичиг” үзэсгэлэнг Бүгд Найрамдах Солонгос улсын Сөүл хотын Каннам дүүргийн Ёгсам I Соёлын төвийн үзэсгэлэнгийн танхимд 2025 оны 2-р сарын 26-наас 3-р сарын 2-ны хооронд зохион байгуулжээ.
Үзэсгэлэнд дараах бүтээлүүд дэлгэгдсэн байна:
- “Монгол хэл, бичиг” уралдаанд шалгарсан 16 бүтээл
- Н.Баатарцогт, Б.Шаравнямбуу зэрэг уран бүтээлчдийн бүтээл
- “Бичиг соёл төв”-ийн бүтээлүүд
- “Монголын сайхан бичигтэн” уран бичлэгийн олон улсын уралдаанд оролцсон 53 бүтээл
- ЕБС-ийн багш, сурагчдын монгол бичгийн 8 бүтээл
- Нийт 80 гаруй бүтээл
Энэхүү үзэсгэлэнг 250 гаруй хүн үзэж сонирхжээ.
Үзэсгэлэнгийн хүрээнд зохион байгуулсан арга хэмжээ
- “Монгол хэл, бичиг - бидний бахархал” сэдэвт нэг өдрийн сургалтад 50 оролцогч хамрагдсан.
- “Монгол хэл, бичиг” монгол бичгийн уралдаанд 28 оролцогч бүтээлээ ирүүлэн өрсөлджээ.
Боловсролын ерөнхий газрын мэдээлснээр, энэхүү арга хэмжээ нь гадаад улсад ажиллаж, амьдарч буй монголчууд, хүүхэд багачууд, монгол судлаачдад монгол бичгийг түгээн дэлгэрүүлэх, ёс заншлаа өвлүүлэн суралцуулах зорилготой юм.
