Нийслэл хүрээний 113 жилийн ойг тохиолдуулан “Богдын хүрээ хотыг дүрсэлсэн монгол зураг /XVIII-XX зууны эхэн үе/” сэдэвт тусгай үзэсгэлэнг Монгол арт галерейд хоёрдугаар сарын 7-нд нээхээр болжээ.
Үзэсгэлэнгийн онцлог
Үзэсгэлэнд Богдын хүрээ хотыг дүрсэлсэн монгол зураг, түүхэн гэрэл зургууд, баримтат нэвтрүүлэг гэсэн гурван хэсэгтэй бүтээлүүд тавигдах юм. Нийслэлийн соёл, урлагийн газар, Улаанбаатар хотын музей, Монгол арт галерей хамтран зохион байгуулж байна.
Анх удаа олон нийтэд дэлгэх бүтээлүүд
Үзэсгэлэнгийн үеэр 1870-аад онд Богдын ордны зураачийн зурсан “Их хүрээ хот” монгол зургийг анх удаа эх хувиар дэлгэн үзүүлэх бөгөөд тус бүтээл долоо хоногийн хугацаанд олны хүртээл болох юм.
Түүнчлэн Их хүрээний дүрслэл бүхий шинээр амилуулсан хуулбар зургийн нээлт болно. Монгол арт галерейн зураач, МУЭ-ийн гишүүн Ц.Оюун-Эрдэнэ дөрвөн жилийн турш уг бүтээлийг туурвиж, Улаанбаатар хотын музейн эрдэм шинжилгээний ажилтан Г.Очбаяр сүүлийн гурван жил уг зургийн түүх, урлагийн судалгааг хийж буй.
Үзэсгэлэнд дэлгэгдэх бүтээлүүд
Үзэсгэлэнд Богд хааны ордон музей, Г.Занабазарын нэрэмжит Дүрслэх урлагийн музей, Улаанбаатар хотын музей, Үндэсний төв архив, Үндэсний номын сан, Швейцар Улсын Базел хотын Соёлын музей зэрэг дотоод, гадаадын музей, архив, хувийн цуглуулгаас Богдын хүрээ хотыг харуулсан нийт 30 орчим монгол зураг багтаж буйгаараа онцлогтой.
Тус үзэсгэлэн гуравдугаар сарын 1 хүртэл үргэлжлэх бөгөөд олон нийт Богдын хүрээний бүтэц, зохион байгуулалт, баяр наадам, төрийн ёслол, монгол зурагт хэрхэн дүрслэгдсэн түүхэн үнэ цэнийг танин мэдэх боломжтой юм.
