Улаанбаатар, 2024 оны зургаадугаар сарын 18 /МОНЦАМЭ/. Өнөөдрөөс эхлэн тав хоног бороотой байхыг цаг уурчид мэдээлэв.

Өнөөдөр Улаанбаатар хот орчмоор үүлшинэ. Дуу цахилгаантай аадар орох бөгөөд салхи баруун өмнөөс хойш эргэж секундэд 5-10 метр, борооны өмнө түр зуур ширүүсэх аж.

Цаг уур, орчны шинжилгээний газраас мэдээлснээр зургаадугаар сарын эхний 10 хоногт сэрүүсэх, хоёрдугаар 10 хоногт огцом халах, гуравдугаар 10 хоногт гэнэтийн дуу цахилгаатай аадар, мөндөр орох, борооны өмнө хүчтэй нөөлөг салхитай байх, долоо болон наймдугаар сард олон жилийн дунджаас их бороо орох урьдчилсан төлөвтэй байгаа юм. Иймд болзошгүй үерийн аюулаас сэргийлэхийг Онцгой байдлын ерөнхий газраас зөвлөлөө.

Тус зөвлөмжид

-Сэрэмжлүүлэг мэдээг хэвлэл, мэдээллийн хэрэгсэл болон бусад эх сурвалжаас тогтмол хүлээн авах

-Гэр, хашаа, саравч, орон байрыг үерийн усны зам, голын голдирол, гуу, жалга, хуурай сайр, ус хальдаг эрэг, татамд барихгүй байх

-Орон сууцны хорооллын гарааш, В1 давхар руу ус орохоос сэргийлэн хамгаалалт татах

-Үер, усны аюулаас хамгаалах далан, суваг, шуудуу, хашлага барих

-Үер, усны аюулын талаар хүүхдэд анхааруулга, сэрэмжлүүлэг өгөх, гол мөрөн, нуур, тогтоол ус, цөөрмийн орчимд тоглуулахгүй, орхихгүй байх

-Гол, мөрөн, нуурын ойролцоо амарч зугаалахдаа сонор, сэрэмжтэй байж, уулын ам, голын ай сав, үерийн буулт бүхий газарт отоглож, хоноглохгүй байх

-Голын усны түвшин нэмэгдэж, үерийн байдалд шилжсэн үед, зориулалтын гарцтай газраар зорчих

-Өндөр хүчдэл, цахилгааны дор гэр, сууцаа барихгүй байхыг анхааруулав.