Америкийн найруулагч Шон Бэйкерийн бүтээл "Анора" кино Каннын кино наадмын дээд шагнал болох "Алтан дал мод" шагналыг хүртлээ. Кинонд Оросын олигархын хүүтэй хайр сэтгэлийн холбоотой болсон Бруклин хотын бүжигчин бүсгүйн тухай өгүүлдэг аж.
Энэ жилийн шагналтнуудыг тодруулсан шүүгчдийн бүрэлдэхүүнийг өнгөрсөн жил дэлхий даяар хит болсон "Барби" киноны найруулагч Грета Гервиг ахалж, Испанийн найруулагч Хуан Байона, Америкийн жүжигчин Лили Гладстон нар бүрэлдэхүүнд багтав. "Гран-При" буюу хоёр дахь нэр хүндтэй шагналыг Энэтхэгийн кино найруулагч Паял Кападиагийн “All We Imagine As Light” кино хүртжээ.
Мөн Португалын найруулагч Мигел Гомес “Grand Tour” киногоороо "Шилдэг найруулагч", Америкийн жүжигчин Жесси Племонс “Kinds of Kindness” киногоор "Шилдэг эрэгтэй жүжигчин", харин “Emilia Perez” киноны эмэгтэй жүжигчид болох Адриана Паз, Зои Салдана, Карла Софиа Гаскон, Селена Гомез нар хамтдаа "Шилдэг эмэгтэй жүжигчин"-ий шагналыг гардав.
Шүүгчид Ираны нийгмийг шүүмжилсэн кино бүтээснийхээ улмаас Иранд найман жилийн хорих ял сонссон Ираны найруулагч Мохаммад Расулофын “The Seed of the Sacred Fig” кинонд тусгай шагнал хүртээсэн байна.
Дээд шагнал хүртсэн "Анора" киног дэлгэцнээ гаргах эрхийг Америкийн "Неон" кино компани өнгөрсөн жил авсан бөгөөд энэ оны сүүлчээр кинотеатруудаар гарах төлөвлөгөөтэй байна.
Сонирхуулахад, өмнөх жил Каннын наадмаас шагнал хүртсэн бүтээлүүд Оскарын наадмын 26 номинацид нэр дэвшиж, гурван шагнал хүртсэн байна. Гэсэн хэдий ч "Алтан дал мод" болон Оскарын "Шилдэг кино" шагналыг хоёрхон кино хүртсэн байдаг нь 1955 оны "Marty", 2019 оны Солонгосын "Шимэгч" кинонууд юм.
