“Титаник” уран сайхны киноны гол дүр Рөүзийн амийг аварсан модон тавцан дуудлага худалдаагаар 718 750 ам.доллароор зарагджээ.

Уг кино 1997 онд үзэгчдийн хүртээл болсноос хойш шүтэн бишрэгчид "уг тавцан түүний дурлалт залуу Жекийг ч мөн багтаахаар том хэмжээтэй байсан" эсэх талаар маргаан өрнүүлсээр ирсэн юм. Хаалгатай андуурагдсан тавцангийн хэмжээ нь ойролцоогоор 2.4 м урт, 1 м өргөн байсныг танилцуулгад дурджээ.

Мөн кинонд ашигласан тавцанг 1912 оны эмгэнэлт явдлаас үлдсэн эд зүйлсийн үлдэгдлээр хийснийг Heritage Auctions дуудлага худалдааны ордон мэдэгдсэн байна. Уг тавцан “Planet Hollywood” гэдэг ресторан, амралтын газрын сүлжээний эзэмшилд байсан эд хэрэглэл, хувцаснуудыг үнэ хаялцуулах дуудлагаар худалдаагаар зарагдсан байна. 

Рөүзийг “хувиа хичээсэн”, харин Жекийг “тэнэг” гэж тодорхойлсон цахим шууданг өдөрт олон арваар нь хүлээн авч байсан тухайгаа “Титаник” киноны найруулагч Жэймс Камерон 2012 онд “Mythbusters” телевизийн цуврал нэвтрүүлэгт оролцох үеэр ярьжээ. Тэрбээр "Жек зохиолд дүрсэлсний дагуу үхэх ёстой байсан" гэж хэлснээр мэтгэлцээнд цэг тавьсан байна. 

Дуудлага худалдааны үеэр мөн Индиана Жонсын ташуур 525 мянган доллароор, Тоби Магуайрын өмссөн “Хүн аалз”-ын хувцас, “The Shining” кинонд Жек Николсоны угаалгын өрөөний хаалгыг эвдлэхдээ ашигласан сүх тус тус 125 мянган доллароор зарагдаж, нийт 15.68 сая доллар олсон нь хамгийн амжилттай худалдаануудын нэг болсныг Heritage Auctions дурдсан байна.