Зургийг МРА агентаг

Английн алдарт зохиолч Жорж Оруэллийн дэлхий дахиныг шуугиулсан сэтгэлгээний бүтээл болох “1984” романаас сэдэвлэж “Орфей” театрын хамт олон "1984" постдрамын жүжгийг тайзнаа тавихад бэлэн болоод байна. Жүжгийг энэ сарын 21-нээс эхлэн орой бүр 19:00 цагаас "Улаанбаатар" зочид буудлын их танхимд тоглоно. 

Жүжгийг М.Батболд найруулж, дүрүүдэд МУГЖ Г.Равдан, МУГЖ Ц.Төмөрхуяг, МУГЖ С.Болд-Эрдэнэ, МУГЖ Д.Ганцэцэг, М.Мөнхбат Б.Оюунбаатар, П.Оюунчимэг нар тоглоно.

Жүжгийн зохиолч СУИС-ийн Театрын урлагийн сургуулийн багш Я.Баяраа:

-Жүжгийн зохиолд сэтгэлзүйн драм төрлийг түлхүү барьсан. Амьдралаа эргэцүүлэн боддог, өөрийнхөөрөө сэтгэдэг хүмүүс эрх чөлөөг жинхэнэ утгаар нь эдэлдэг. Тийм нийгэмд эрх чөлөө оршдог. Бодож эргэцүүлдэг хүний өмнө дааж давшгүй их бэрхшээл учирлаа ч өөрийнхөөрөө бодож, сэтгэж амьдарсны үнэ юутай ч зүйрлэхийн аргагүй гэх утга санааг агуулсан. Өөрийнхөө үзэл бодлын эрх  чөлөөний төлөө тэмцэж буй бие хүний драм юм. 

Жүжгийн найруулагч  М.Батболд: 

-Энэ роман өнөөдөр л жүжиг болж тавигдахгүй бол болохгүй юм шиг санагдсан. Сонгодог бүтээл цагаа олно гэдэг маш том ач холбогдолтой. Хамгийн хүчтэй төгс төгөлдөр зүйл бол хайр сэтгэл гэж бид ярьдаг. Энэ зохиолд хүний төрөлхийн бодох, мэдрэх, сэтгэх эрх чөлөө түүнээс ч үнэ цэнтэй гэдэг үзэл санаа цааш хөвөрдөг. 

"1984" зохиолын уншигч: 

-Би 1984 онд амьдарч тэр үеийг бие махбодоороо туулсан хүн. 2000-аад он гараад 21-р зуунд амьдарч гэрэлтэй гэгээтэй болох болов уу гэж бодтол буцаад 1984 рүүгээ явж байгаа мэт энэ цаг үед сэрэмжлүүлэг болгон ийм уран бүтээл хийх гэж байгаад чин сэтгэлээсээ баярлаж байна.