Шинийн наймны өдөр дуучин Б.Бат-Энэрэл бие даасан анхны "Талархал" тоглолтынхоо үеэр Соёлын Тэргүүний Ажилтан(СТА) цол, тэмдгээр энгэрээ мялаасан. Гэвч үүний дараа урлаг, соёлынхны зүгээс олон хүмүүс "Насанд хүрээгүй хүүхдэд СТА цол өглөө. Мэргэжлийн уран бүтээлдчийг дорд үзлээ" гэдэг байр суурийг олон нийтийн сүлжээгээр илэрхийлсэн.
Үүний хариуд дуучин Б.Бат-Энэрэл өөрийн цахим хуудсаар дамжуулан "МУСТА цол тэмдгээр шагнаж байгаа бол Соёлын яамандаа талархлаа. Хүүхэд учраас энэ олон хүний хэл ам дагуулсан цол тэмдэг надад хүнддэх байх аа. Өөр хэрэгтэй хүнд нь өгнө үү" хэмээсэн байдаг.
Харин уг асуудлаар Соёлын яам:
-"Соёлын яаманд "Номт Анар" ХХК-аас Б.Бат-Энэрэлийг СТА хүндэт тэмдгээр шагнуулах хүсэлт, тодорхойлолтыг энэ сарын 16-ны өдөр ирүүлснийг холбогдох журмын дагуу шалгаж байна. Манай зүгээс дуучин Б.Бат-Энэрэлийг уг тэмдгээр шагнаагүй" хэмээх тайлбарыг өгсөн юм.
Тэгвэл ямар шаардлага хангасан хүнийг СТА цол тэмдгээр шагнадаг талаар тодруулахад
- Соёл урлагийн салбарыг хөгжүүлэх үйлсэд бодитой хувь нэмэр оруулсан
- Ажлын өндөр амжилт гаргасан
- Онцгой бүтээл туурвисан
- Сахилгын болон ёс зүйн зөрчилгүй
- Соёл урлагийн салбарт 12-оос, тухайн байгууллагадаа гурваас доошгүй жил ажилласан байх журамтай гэлээ.