АНУ-ын Ерөнхийлөгч Дональд Трамп ОХУ, БНХАУ-д шахалт үзүүлэхийн тулд цөмийн зэвсгээ хөгжүүлнэ гэж хэллээ. Тэрбээр сэтгүүлчийн өмнө Оросын тал 1987 оны энэ гэрээг зөрчсөн гээд хүмүүст үүнийг мэдрэгдтэл цөмийн зэвсгээ хөгжүүлнэ гэж хэлсэн байна.

Түүнчлэн “Энэ бол уг тоглоомонд Хятадын талыг оролцуулахыг хүссэн хүн бүр, Орос зэрэг улсуудад өгч буй анхааруулга” гэсэн юм. Түүний энэ мэдэгдэлтэй холбоотойгоор АНУ гэрээг цуцлах нь нөгөө талаар Хятадын эсрэг арга хэмжээ болж байгааг хэвлэл дурдаж байна. Учир нь гэрээнд БНХАУ-ын талаас гарын үсэг зурж оролцоогүй учраас ийм төрлийн зэвсэг хөгжүүлж магадгүй гэсэн тайлбар байна.

Хуучин ЗХУ, АНУ-ын байгуулсан 1987 оны Дундын болон бага тусгалын пуужин устгах олон улсын гэрээгээр 500-5500 км-ийн тусгалтай цөмийн болон цөмийн бус газраас хөөргөх дунд тусгалын пуужинг хориглосон байна.

АНУ гэрээнээс гарснаар цөмийн зэвсэг үл дэлгэрүүлэх хүчин чармайлтыг сулруулна гэж хуучин ЗХУ-ын Ерөнхийлөгч Михайл Горбачев ням гарагт хэлсэн. Харин АНУ-ын зүгээс “НАТО-гийхны дунд "Эс-Эс-Си-8" гэж нэрлэгддэг маш богино хугацаанд цөмийн цохилт хийх чадавхтай "Новатор 9-эм-729" хэмээх шинэ төрлийн дундын зайн пуужинг Москва хөгжүүлж, олон улсын гэрээг зөрчиж байна гэж мэдэгдсэн юм.

Хоёр улсын энэ маргаантай зэрэгцэн Германы Гадаад хэргийн яам АНУ-ын Ерөнхийлөгчийн гэрээнээс татгалзах шийдвэрийг үл хүндэтгэсэн шийдвэр гээд Дундын болон бага тусгалын пуужинг устгах энэ гэрээ маш чухал, тэр дундаа Европын улсуудад ач холбогдолтой зүйл гэж үзэж байгаагаа илэрхийлээд байна.

mnb.mn