Засгийн газрын хуралдааны дараа Боловсрол, шинжлэх ухааны сайд Л.Энх-Амгалан Боловсролын багц хуулийн шинэчлэлийн талаар мэдээлэл өглөө. 

"330 суманд байгаа сургуулиуд заавал 12 жилийн тогтолцоотой байх албагүй"

Сайд Л.Энх-Амгалан "330 суманд байгаа сургуулиуд заавал 12 жилийн тогтолцоотой байх албагүй. 10-12 дугаар ангидаа цөөхөн хүүхэдтэй байгаа сургуулиудыг сум дундын ахлах сургууль болгон өөрчлөн зохион байгуулна. 

Улаанбаатар хотод гурван ээлжид орох эрсдэл үүссэн сургуулиудын хэв шинжийг нь бид харах ёстой. 84 дүгээр сургууль, Эрдмийн өргөө цогцолбор ч гэдэг юм уу 6,000-аас дээш хүүхэдтэй сургууль бий болчихсон байна.

Энэ сургуулиуд хичээл, боловсролын чанарын тухайд хүндрэлтэй байна" гэлээ. 

"ШУТИС, ХААИС, МУИС-ийн харьяа төрөлжсөн ахлах сургуулийг бий болгоно"

"Энэ хичээлийн шинэ жилээс эхлэн нийслэлд төрөлжсөн ахлах сургуулиудыг зохион байгуулна. Тодруулбал, ШУТИС, ХААИС, МУИС-ийн харьяа төрөлжсөн ахлах сургууль гэх мэтчилэн байх болно. Ганцхан Улаанбаатар хотод биш орон нутагт байгаа их, дээд сургуулийг түшиглэсэн төрөлжсөн ахлах сургууль бий болгоно. 

Сургуулийн зориулалтын бус объектуудыг худалдаж аваад сургуулийн зориулалтынх болгож өөрчилнө. Нийслэлд 500 тэрбум төгрөгийн бонд гаргаж байгаа. Үүний 100 тэрбум төгрөгийг олон жил ашиглалтад орохгүй хүлээгдэж байгаа сургууль, цэцэрлэгийн барилгын ажлыг эрчимжүүлэхэд чиглүүлнэ" гэв. 

Мөн үргэлжлүүлэн "УИХ энэ хавар Боловсролын багц хуулийг баталсан. Шинэ хуулийн эрх зүйн орчинд нийцүүлэн хичээлийн шинэ жилээ зохион байгуулах хэрэгцээ шаардлага үүсэж байгаа. Улсын хэмжээнд гурван ээлжээр хичээллэх эрсдэл үүссэн 68 сургууль бий. Тухайн сургуулиудад 50,000 гаруй хүүхдийн асуудал байгаа юм. Үүнээс Улаанбаатар хотод 47 сургуульд 33,000 хүүхдийн асуудал байна. 

Яагаад нэг ангид 50-60 хүүхэд хичээллэх нөхцөл байдал үүссэн бэ? Шалтгаан нь юу байв гэдгийг олж тогтоох ажлыг бид эхлээд хийсэн. Гурван үндсэн шалтгаан байсан гэж бид тогтоосон.

Нэгдүгээрт, 70,000 хүүхэд нэгдүгээр ангид ороход 30,000 хүүхэд 12 дугаар анги төгсөж байгаа. Жил бүр 35,000-40,000 хүүхдийн зөрүү гарч байгаа болохоор дунд, ахлах ангид тодорхой ачаалал үүсэж байна. Тиймээс шинэ хичээлийн байр, анги танхимын хэрэгцээ шаардлага үүсэж байгаа юм.

Хоёрдугаарт, хөрөнгө оруулалтын оновчгүй төлөвлөлт их хийдэг. Газаргүй, зураггүй сургуулийн хөрөнгө оруулалтыг төлөвлөж байгаагаас болж сургууль, цэцэрлэгүүд олон жил ашиглалтад орохгүй хүлээгдэж байна. 

Гуравдугаарт, хот төлөвлөлтийн алдааг нэрлэж байна. Улаанбаатарт сургуульгүй 50 хороо байна. Цэцэрлэггүй 17 хороо байгаа. Тэгсэн мөртлөө өндөр өртгөөр Нарны болон Маршал, Хүннү зэрэг хорооллыг барьдаг. Гэвч тэнд нь сургууль, цэцэрлэг байдаггүй. Тухайн баригдаж байгаа хороолол сургууль, цэцэрлэгтэй байх зохицуулалттай. Тухайн хорооллыг барьж байгаа компаниуд газрын зөвшөөрөл, архитектур төлөвлөлтийн даалгавар авахдаа сургууль, цэцэрлэгээ төлөвлөсөн байдаг. Гэтэл улсын комисст хүлээлгэж өгөхдөө хорооллуудаа хэсэгчилдэг. Анхны төлөвлөж байснаараа ажлаа хийдгүйгээс үүдэн сургууль, цэцэрлэггүй олон хороолол бий болж байна. 

Энэ талаар Засгийн газраас богино, дунд, урт хугацаанд бодлогын ямар арга хэмжээ авах талаар баримт бичгүүд гаргаж байна. Энэ ондоо багтаан хөрөнгө оруулалтыг эрчимжүүлэх шийдвэр гарсан. Барилгын ажил нь удааширсан 74 сургууль, цэцэрлэгийн ажлыг эрчимжүүлнэ" гэлээ.