Өөрийн суралцдаг коллежид аллага үйлдсэн оюутан багш нартайгаа асуудалтай байсан байж болзошгүй талаар “Интерфакс” агентлаг нэрээ дурдаагүй эх сурвалжаас иш татан мэдээлсэн байна.

Хоёр хоногын өмнө Крымийн хойгийн Керчь хотын политехникийн коллежид Владислав Росляков гэдэг оюутан дэлбэрэлт хийж, буудлага үйлдсэний улмаас 20 хүн амь эрсдэж, 50 хүн шархадсанаас 10 нь сэхээн амьдруулах тасагт байна.

Дээр дурдсан эх сурвалжийн мэдээлснээр, Росляков хэт үзэлт залуучуудын бүлэглэлд багтдаг байж болзошгүй гэдэг хувилбарыг шалгаж байгаа, одоогоор нотолгоо байхгүй гэж байна. Мөн Владислав Росляков нь дурлалын шархтай байсан гэх, тоогдоогүй охиноо гартаа буутай сургуульд дотроо хайж явсан талаар гэрчүүд мэдээлсэн байна. Уг шалтгаанаас болж энэ хэргийг үйлдсэн гэж үзэж байгаа ч мөн тодорхой болоогүй.  Харин гэмт этгээд буудлагын клубт явдаг, зэвсэг сонирхдог байсан гэнэ.

Эмгэнэлт явдал болсон газраас сумны 10-аад хайрцаг, 10 орчим гар хийцийн тэсрэх төхөөрөмж, шатамхай шингэн бүхий лонхнууд олдсон байна.

Гэрчүүд болон хүчний байгууллагуудын мэдээлж байгаагаар, 18 настай оюутан Росляков коллеж руугаа ангийн буутай нэвтэрч, замдаа таарсан хүн бүхэн рүү буудаж, дараа нь олон оюутантай байсан цайны газарт дэлбэрэлт үйлдсэн юм байна.

Дараа нь түүнийг коллежийн номын санд амиа егүүтгэж нас барсан байхад нь олсон. Хэргийг цагдаа нар “алан хядах ажиллагаа” гэж тодорхойлж мөрдлөг явуулж эхэлсэн ба нотлох баримт, хэрэг үйлдэлтийг шалган “аллага” хэмээн үзэж байгаа аж. 

Крымийн захирагч Сергей Аксенов сэтгүүлчдэд мэдээлэл өгөхдөө "Тухайн этгээд шашны аль нэг секттэй холбоотой байгаагүй, мөн ганцаараа, хэн нэг хамтрагчгүйгээр хэргийг үйлдсэн" гэж ярьжээ.