2023 оны зургадугаар сарын 16-ны өдөр олон нийтийн цахим сүлжээнд Гандантэгчэнлин хийдэд шавилан суралцаж байгаа хүүхдүүд бэлгийн дарамтад өртсөн гэх мэдээлэл цацагдсан. Гандантэгчэнлин хийдийн дотуур байранд амьдардаг 100 орчим лам, ламхай нарт ямар  нэгэн хүчирхийллийн шинжтэй харилцаа байдаггүй бөгөөд хуулийн байгууллага шалгаж байгаа гэж тус байгууллагын төлөөлөл хэлж байна. Тэгвэл хүчирхийлэлд өртсөн хүү олон удаа биеийн болон бэлгийн хүчирхийлэлд өртөж байсан гэдгийг түүний ээж хэлжээ.

Олон нийтийн цахим сүлжээнд цацагдсан мэдээллийн дагуу Баянгол дүүргийн Цагдаагийн газраас хойшлуулшгүй ажиллагаа явуулж, тус хэргийг цагдаагийн байгууллагын гомдол, мэдээллийн бүртгэлд авч мөрдөн шалгах ажиллагааг явуулж байгаа юм.

Энэхүү хэргийн талаар хохирогч хүүгийн ээжээс тодруулахад, хохирогч хүү дотуур байранд амьдарч эхэлсэн цагаас эхлэн биеийн болон бэлгийн хүчирхийлэлд өртсөн гэх мэдээллийг өгч байна.

Жилд дунджаар Гандантэгчэнлин хийдийн дотуур байранд 8-9 хүүхэд амьдрахаар ирдэг байна. Өнөөдрийн байдлаар уг дотуур байранд 100 орчим лам, ламхай амьдарч байгаа юм байна. Нэг өрөөнд 2-8 орчим хүүхэд байрладаг бөгөөд хүчирхийлэл дарамт байдаггүй тус хэргийг шалгуулахаар хууль хүчний байгууллагад хандсан гэдгийг тус газрын төлөөллүүд хэлж байсан юм.

Тухайн дотуур байранд амьдарч байгаа лам нарыг нийт таван багш хариуцан ажилладаг байна. Гэсэн хэдий ч хүүхдүүдийн нийгмийн хамгаалал болоод сэтгэл зүйг хариуцан ажиллах сэтгэл зүйч, нийгмийн ажилтан байдаггүй юм байна. Харин 6 сард нэг удаа хүүхдийн эрхийн чиглэлээр үйл ажиллагаа явуулдаг байгууллагаас сэтгэл зүйч, албан хаагчид ирж ажилладаг гэсэн юм.

Төв Гандантэгчилэн хийдийн дотуур байр 2019 онд ашиглалтад оржээ. Өсвөр насны хүүхдүүд амьдардаг гэх өрөөнд ороход хүүхдийн  наад захын хэрэгцээг хангах стандартад нийцээгүй ариун цэврийн байдал хангагдаагүй, шугам сүлжээний асуудлаас шалтгаалж хүйтэн орчин нөхцөлтэй байсан юм.

mongoltv.mn