Монгол, Орос, Хятадын Худалдаа Аж Үйлдвэрийн танхимуудын Худалдаа, эдийн засгийн XVI чуулган Улаанбаатар хотноо эхэллээ.

Энэхүү Худалдаа, эдийн засгийн чуулганд ОХУ-ын ХАҮТ-ын Ерөнхийлөгч С.Н.Катырн болон хил залгаа 13 муж, улсын ХАҮТ-ын удирдлага, нийт 100 гаруй төлөөлөгч оролцож байна. 

Чуулганыг нээж МҮХАҮТ-ын Ерөнхийлөгч О.Амартүвшин үг хэллээ. 

Тэрээр "Хил залгаа орших дэлхийн хоёр том гүрний эдийн засаг, нийгмийн байдал нь Монгол Улсын эдийн засгийн нөхцөл байдалд шууд нөлөө үзүүлдэг бөгөөд хөрш орнуудтай харилцах эдийн засаг, худалдааны харилцаа маш чухал үүрэгтэй. 2022 оны эцсээр Монгол Улсын гадаад худалдааны эргэлт 21.2 тэрбум ам.доллар байсан ба үүнд БНХАУ-тай хийсэн худалдаа 64 хувийг, ОХУ-тай хийсэн худалдаа 12.7 хувийг эзэлж байна. 2022 онд нийт импортын 30 хувийг ОХУ-тай хийсэн нь сүүлийн 10 жилийн хамгийн өндөр түвшиндээ хүрчээ. Харин 2019 онд Монгол Улсад орж ирсэн гадаадын шууд хөрөнгө оруулалтын 6.4 хувийг БНХАУ ба ОХУ бүрдүүлж байсан бол 2022 онд 3.7 хувь болж буурсан үзүүлэлттэй байна.

Эдийн засгийн коридор дахь чөлөөт бүсүүдийн хамтын ажиллагааг идэвхжүүлэх, хөрөнгө оруулалтын нэмэгдүүлэхэд Танхимуудын үүрэг оролцоо чухал. Монгол Улсын газарзүйн байршлын онцлогт тулгуурлан олон улсын транзит тээврийг хөгжүүлэх, энэ хүрээнд гурван улсын эдийн засгийн коридорын хөтөлбөрт тусгасан төслүүдэд хамтран ажиллах боломж бизнес эрхлэгчдэд нэмэгдэнэ" гэлээ.