Өчигдөр цахим сүлжээнд Турк улсын газар хөдлөлтийн гамшигт Монголоос очиж ажилласан Онцгой байдлын аврагчдын томилолтын мөнгийг өнөөдрийг болтол өгөөгүй байгаа гэдгийг хамт явж сурвалжлага бэлтгэсэн Сэтгүүлч Н.Мичидмаа нийтэд мэдээлсэн. 

Тэгвэл БНТУ-д болсон газар хөдлөлтийн гамшгийн голомтод үүрэг гүйцэтгэсэн Монголын эрэн хайх, аврах багийн алба хаагчдад олгох томилолтын зардлыг олгож эхэлсэн талаар ОБЕГ-ын дарга, хошууч генерал Г.Ариунбуян мэдээллээ. 

Тэрээр “Монголын эрэн хайх, аврах багт үүрэг гүйцэтгэсэн нийт 36 алба хаагчийн томилолтыг өдрийн 140 доллараар тооцож, “Гамшгаас хамгаалах тухай хууль”-ийн 50.2. “Голомтын бүсэд ажилласан онцгой байдлын байгууллагын алба хаагч болон бусад төрийн цэргийн байгууллагын алба хаагчийн албан томилолтын зардлыг ердийн үеийнхээс гурав дахин нэмэгдүүлж олгоно” гэж заасны дагуу 420 доллар буюу 16.200.000 төгрөгийг нэг алба хаагчид олгохоор шийдвэрлэсэн. Шийдвэрийн дагуу алба хаагчдын томилолт олгогдож эхлээд байна. 36 албан хаагчид нийт 585 сая төгрөг олгоно. 

Өнөөдрийн байдлаар хүмүүнлэгийн тусламжаар хүргэгдсэн хүнсний болон бусад төрлийн бараа, тээврийн зардалд тодорхой хэмжээний хэмнэлт гарсан учраас санхүүгийн тохируулга хийх замаар санхүүжилтийн асуудлыг үе шаттай шийдэж байгаа. Үлдсэн санхүүжилтийг ойрын хугацаанд шийдвэрлэж, томилолтын асуудлыг бүрэн дуусгана" гэлээ.