УИХ-ын дарга Г.Занданшатарын ивээл дор “Илүү их уншъя” уриатай болсон Номын баярын гурав дахь өдөр УИХ-ын Ерөнхий нарийн бичгийн дарга Л.Өлзийсайхан төв талбайд ажиллалаа. 33 дахь удаагийн энэхүү Номын баярт УИХ-ын Тамгын газар өөрийн асартаа Парламентын номын сангийн сан хөмрөгт байдаг Монгол Улсын 1924, 1940, 1960 оны болон шинэ Үндсэн хуулийн ховор сонин хэвлэлтүүдийг дэлгэн үзүүлж, бүх нийтийн Үндсэн хуулийн, хүний эрхийн, парламентын боловсрол, мэдлэгтэй холбоотой үйл ажиллагаа, ном товхимлыг танилцуулсан юм.

УИХ-ын Ерөнхий нарийн бичгийн дарга Л.Өлзийсайхан Номын баярыг зорин ирсэн уншигчид, гэр бүл, анги хамт олноороо яваа хүүхэд багачууд, хэвлэн нийтлэгчид, зохиолч, уран бүтээлчидтэй уулзаж, шинээр олны хүртээл болж буй ном, бүтээлийг үзэж сонирхохын зэрэгцээ УИХ-ын Тамгын газраас хэрэгжүүлж буй “Парламентын боловсрол хөтөлбөр”-ийн талаар танилцуулав.

Тэрбээр, Монгол Улсын үндэс бол Монголын газар шороо, Монгол хүн болохыг онцолж, улс орныхоо, хүн ардынхаа хөгжил дэвшлийн төлөө хүн бүр идэвхтэй оролцдог, ингэж оролцохдоо зөв ойлголт, мэдээлэлтэйгээр оролцдог байх нь чухал бөгөөд үүнийг “Парламентын боловсрол” хөтөлбөр зорилгоо болгодог гэсэн юм. Мэдлэг мэдээлэл бол хүч юм хэмээгээд тэрбээр, хүүхэд залуучууд энэ хүч чадлыг ухамсарлаж, өөрийгөө хүчирхэгжүүлэн, бидний хамтын үнэт зүйл болсон ардчилал, хүний эрх, Үндсэн хуулийн тухай ойлголт, мэдлэгээ гүнзгийрүүлэх нь орчин үеийн иргэн хүний хөгжлийн гол чиг хандлага болж буйг дурдав.

Түүнчлэн УИХ-ын Ерөнхий нарийн бичгийн дарга Л.Өлзийсайхан Монгол Улсын Үндсэн хуулийн үзэл баримтлал, ардчилал, хүний эрхийн суурь ойлголтуудыг хүүхэд багачуудад ойлгомжтойгоор хялбаршуулан тайлбарласан “Үндсэн үлгэр” номыг танилцууллаа.

Мөн цугласан хүүхэд багачуудын дунд уран бичлэгийн болон зургийн уралдааныг зохион байгуулж, УИХ-ын Тамгын газрын санаачилгаар бүтээсэн “Үндсэн үлгэр” номын дээжээс гардуулав. Номын баярыг 2019 оноос УИХ-ын дарга Г.Занданшатар ивээлдээ авч агуулгажуулах, хууль тогтоомжоор баталгаажуулах зэрэг олон ажлыг хийж байна. Энэ жилийн 33 дахь Номын баярыг тэрбээр “үндэсний бичиг соёл”-ын агуулгаар баяжуулан явууллаа.