#NoWar, #NoDoubleStandard, #PoliceReform хөдөлгөөнөөс Монгол улс хувь хүний эрх, эрх чөлөөнөөс ухарч байгаа талаар мэдээлж, эрх баригчдад шаардлага хргүүлж байгаагаа мэдэгдлээ.

Тэд Эрүүгийн хуулийн 11.6,13.14, 23.1 заалтуудад өөрчлөлт оруулж, жагсаал цуглаан хийх журмын тухай хуулийг "Эрх чөлөөний хууль" болгож өөрчлөх шаардлагатай байгааг онцлов.

Энэ үеэр Б.Цацрал "Бидний зүгээс тавьж буй энэ гурван шаардлагад "Эрүүгийн хуулийн 23.1 буюу хууль сахиулагчийн биед халдах" гэсэн заалт байгаа. Яг энэ заалтаар #NoDoubleStandard-ыг өргүүлж явж байсан зургаан залууд 1-1,2 жилийн хугацаатайгаар зорчих эрх хязгаарлах цахим гав зүүлгэсэн. Энэ цахим гавны хэрэгжилтийг амьдрал дээр туршиж үзэхэд маш олон иргэдийн эрхийг хязгаарлах зэрэг зөрчлүүд гарч байгаа. Олон нийтэд мэдээлж байгаа нь л бид боловч байгаа газрыг буруу заадаг, баттерай нь дуусдаг зэргээс болж олон хүн дүүргийн хязгаарлалтын "ял"-аа хорих "ял" болгосон тохиолдлууд байна. Ийм учраас "Эрүүгийн хуулийн 23.1 буюу хууль сахиулагчийн биед халдах" гэдэг заалтыг солих, өөрчлөх шаардлагатай. 

Дараагийнх нь "Эрүүгийн хуулийн 13.14-ийн албан тушаалтны нэр төрд халдах" гэдэг заалт. Энэ эрүүгийн хуулийн заалтаар #NoWar, #NoDoubleStandard-ийн гишүүн Э.Одбаяр твиттер хуудаснаа Ерөнхий сайд Л.Оюун-Эрдэнийн албан тушаалыг товчилж бичсэнээс нэр төрд халдсан гэж 1.2 жилийн ял авсан. Энийг мөн өөрчлөх шаардлагатай. 

Мөн "Эрүүгийн хуулийн 11.6-д заасан хөнгөн гэмтэл учруулах" гэсэн заалт. Энэ заалт орсноос хойш хүний эрх зөрчигдөж байгаа талаар нээлттэй тайлан хийх хэрэгтэй байна. Дүн шинжилгээ судалгаа хийж байгаа байгууллагууд олон нийтэд нээлттэй мэдээл гэдэг шаардлагыг хүргүүлж байгаа юм. 

Дараагийнх нь "Жагсаал цуглаан зохион байгуулах журмын тухай хуулийг Үзэл бодлоо илэрхийлэх эрх чөлөөний хууль" болгон шинэчлэн найруулах санаачлагыг бид гаргаж, 2021, 2022 онуудад өгч байсан. Энэ дээр мөн нээлттэй сонсгол хийгээчээ гэдэг шаардлагыг хүргүүлж байсан. Энийг одоо хүртэл авч хэлэлцээгүй. 

Одоо Жагсаал цуглаан зохион байгуулах журмын тухай хуульд нэмэлт өөрчлөлт оруулна гэж байгаа. Энэ хууль 1994 онд батлагдсан. Энэ хуулийг хэрэгжүүлэхдээ цагдаагийнхан дандаа иргэдийнхээ эсрэг ашигладаг. "Бүртгүүлэх" заалтыг "зөвшөөрөл авах" гэж ойлгодог. Тэгээд тавьж буй шаардлага нь зөвшөөрөлгүй жагсаал, цуглаан зохион байгуулсан учраас гээд зөрчлийн хэрэг үүсгэдэг" гэлээ. 

Мөн тэрээр "#No war хөдөлгөөн өрнөснөөс хойш 20 гаруй зөрчлийн хэрэг үүсгэж, тав, зургаан удаагийн шүүх хурал болсон. Жагсаал цуглаан зохион байгуулах журмын тухай хууль иргэдийн эвлэн нэгдэх, үзэл бодлоо илэрхийлэх эрхийг хангаж чадахгүй байна. Одоо нэмэлт өөрчлөлт оруулах цаг биш. Бүхлээр нь шинэчлэн найруулах хэрэгтэй" гэдгийг онцолж байв. 

Мөн Цагдаагийн Ерөнхий газрын дарга Ж.Болдыг огцруулахыг шаардаж байгаагаа илэрхийлэв. Учир нь цагдаагийн байгууллагын өдөр тутам явуулж буй үйл ажиллагаа нь хүний эрхийг ноцтой зөрчиж, хүний биед халддаг, гүтгэн доромжилдог хүний эрхийн ойлголтгүй байна. Цагдаагийн алба хаагчид өнөөдөр иргэддээ үйлчилж чадахгүй байгаа гэдгийг хэлээд ийм байдлыг өөрчлөхийн тулд дээрээс нь эхэлж солих шаардлагатайг онцлов.