АН-ын Нарийн бичгийн дарга О.Баасанхүүгээс цаг үеийн холбогдолтой зарим зүйлийг тодрууллаа.

-Лу.Гантөмөр дарга шүүхэд нэрээ бүртгүүлж гэрчилгээгээ авсан. Одоо тамгаа авах ямар боломж байна?

-Тамга гэдгийг модон юм уу эсвэл хуванцар ч гэдэг юм уу харагдах байдлаас нь олон нийт ойлгоод байх шиг байна. Гол учир нь тамганы дотор байгаа хяналтын дугаарт агуулагддаг. Хуулиар тухайн намыг итгэмжлэлгүйгээр төлөөлөх итгээд тэрхүү хяналтын дугаарыг эзэмшдэг. Улсын дээд шүүхээс Лу.Гантөмөр даргад хяналтын дугаарыг ойрын хугацаанд олгоно гэж ойлгож болно. Өөрөөр хэлбэл, өмнө нь байсан хяналтын дугаарыг өөрчлөөд шинэ дугаар авах гэж байгаа. Улсын бүртгэлийн ерөнхий газар энэ асуудлыг шийднэ шүү дээ. Тиймээс төрийн байгууллагад материалаа өгчихсөн учраас хүлээж байна. Ер нь маш ойрын хугацаанд гэж найдаж байна. Удаах шаардлага, шалтгаан байхгүй.

-Өнгөрсөн хугацаанд тамгатай холбоотойгоор үүсээд байсан асуудлуудыг яаж шийдвэрлэв?

-Тухайн үед намын даргаа томилж амжаагүй байсан. Тиймээс намын өмнөх дарга болох С.Эрдэнэ гэж хүн тамганы хяналтын дугаарыг эзэмшиж байсан.

Энэ утгаараа хяналтын дугаарыг өөрчлөөд шинэ дугаар авсан. Энэ дугаарыг С.Эрдэнэ дарга эзэмшиж авч явах боломжгүй гэдгийг Дээд шүүх нэгэнт тогтоосон шүү дээ. Тиймээс гэрчилгээнд өөрчлөлт орсон. Иймд шинээр сонгогдсон намын дарга хяналтын шинэ дугаар хийлгэж эзэмшээд явах бүрэн боломжтой.

-С.Эрдэнэ даргатай ойлголцсон уу. Ойлголцох ажлыг хийж байна уу?

-Аливаа зүйл дүрэм журам, хуулийн хүрээнд явна шүү дээ. Намын Их хурал, Үндэсний бодлогын хороо хуралдаад намын даргаар Лу.Гантөмөр даргыг сонгосон. Ингээд Улсын дээд шүүхэд Лу.Гантөмөр гэж хүн Ардчилсан намын даргаар бүртгэгдсэн. Тиймээс өнөөдөр хууль дүрмийнхээ дагуу манай намын ажил явж байна. Намд гавьяа байгуулсан маш олон хүн бий. Гэхдээ би гавьяа байгуулсан гээд өмчлөөд яваад байж болохгүй. Нам гэдэг бол дүрэм журам, олонхоороо шийддэг, явдаг. Тэр журмаараа явах ёстой гэж бодож байна. Ер нь мөнхийн намын дарга гэж байж болохгүй.

-Сонгуулийн хууль хэлэлцэгдэж байна. Та тус хуульд ямар дүгнэлттэй байгаа вэ?

-Сонгуулийг зардлыг багасгая гэж байгаа нь зөв. Жишээлбэл, зузаан цаасан дээр хэвлэсэн сэтгүүл, плакатыг тойргийн айлуудаар тараадаг. Тэрийг болиулж байгаа юм байна гэж ойлгосон. Энэ нь зөв. Нэр дэвшигчийн уулзалтад ирсэн сонгогчид тэрхүү тараах материалыг өөрсдөө авсан нь дээр. Сонгогчид өөрийнхөө дэмжиж байгаа хүний материалыг л авна шүү дээ. Өмнө нь тухайн тойрогт нэр дэвшиж байгаа бүх нэр дэвшигчийн материал овоорчихдог байсан.

Хоёрдугаарт, ухуулагч нэртэй ухуулагч биш хүмүүс ажилладаг байсан. Тэрийг болиулж байгаа гэж ойлгосон. Угтаа бол ухуулагчид ухуулга хийж байгаа нэр дэвшигчийнхээ талаар чин сэтгэлээсээ сурталчлах ёстой. Гэтэл аав ээжийнхээ ятгалаг, шахалтаар ихэвчлэн оюутнууд ухуулагч хийдэг. Гэртээ зүгээр сууж байхаар ухуулга тараасан болоод цалин авъя гээд халуун наранд хатаж үхтлээ явдаг. Айлын хаалганд нь өлгөчихдөг. Хогийн саванд нь хийчихдэг. Энэ мэтээр баахан үргүй зардал гардаг. Үүнийг болиулах нь зөв.

-Жагсаалттай холбоо МАН-ын саналыг та хэрхэн дүгнэж байна?

-48:28-аараа хийгээд сурчихсан нь дээр шүү дээ. Улаанбаатарын төлөөллийг багасгаж болохгүй. Учир нь хүн амын 50 хувь нь Улаанбаатарт амьдарч байна. МАН-ын танилцуулж байгаа 38:38-ийг дэмжихгүй байгаа. Ямар ч судалгаа байхгүй. Хэдэн хулгайч нарыгаа урдуураа оруулахын тулд тоогоо нэмж байна. Жагсаалтыг улс даяар эрэмбэлүүлэх хэрэгтэй. Жагсаалтаар нэр дэвших гишүүдийн тоог 28 гэж бодъё. Жагсаалтын нэгдүгээрт бичигдсэн хүн 100 хувь гарна. 28-т бичигдсэн хүн 100 хувь гарахгүй гэж хэлж болохгүй. Ард түмэн нэгдүгээрт бичигдсэн хүнийг дугуйлмаар байна уу, 28-т бичигдсэн хүнийг дугуйлмаар байна уу гэдгийг өөрсдөө шийдэг л дээ.

Эх сурвалж: Өдрийн сонин