ОХУ-ын Сибирийн Кемерово хотын "Өвлийн интоор" худалдааны төвд гал гарсны улмаас 37 хүн амь үрэгдлээ. Амиа алдагсдын ес нь хүүхэд байсан талаар Хүүхдийн эрхийн комиссар Анна Кузнецова мэдэгдсэн байна.

Онцгой байдлын яамнаас мэдээлснээр 64 хүн сураггүй алга болсон бөгөөд тэдний 41 нь хүүхэд байгаа гэнэ. 

Кемерово хотын Лениний гудамжинд байрлах тус худалдааны төвд гал гарлаа гэсэн дуудлага Москвагийн цагаар 13 цагт иржээ.  Оросын онцгой байдлын албанаас мэдээлж байгаагаар гал хамгийн дээд буюу 4-р давхарт гарч эхэлсэн гэнэ. Тус давхарт кинотеатр болон хүүхдийн тоглоомын төв байрладаг байсан ба хүүхдийн тоглоомын төвөөс анх гал гарч эхэлсэн байж болзошгүй хэмээн таамаглаж байгаа аж. 

Онцгойгийнхон ослын газар дээр ирэх үед гал 500 мкв талбайг хамарсан байсан ба тэд 20 хүнийг галаас аварч, худалдааны төвөөс нийт 100 хүнийг нүүлгэн шилжүүлжээ. 

Одоогийн байдлаар Оросын хууль хяналтын албаныхан тус осолтой холбоотойгоор санамсар болгоомжгүйгээс гал алдсан, галын аюулгүй байдлыг хангаагүй, санамсар болгоомжгүй үйлдлийн улмаас хоёр ба түүнээс олон хүний амь эрсэдсэн зэрэг зүйл ангиар эрүүгийн хэрэг үүсгээд байгаа гэнэ. 

ОХУ-ын Ерөнхийлөгчийн хэвлэлийн нарийн бичгийн дарга Дмитрий Песковын мэдэгдэж байгаагаар Ерөнхийлөгч В.Путин Кемеров мужийн амбан захирагч Аман Тулеев болон Онцгой байдлын албаны дарга Владимир Пучков нарын “Өвлийн интоор” худалдааны төвд гарсан галын ослын талаарх тайланг хүлээн авсан ба шаардлагатай бүх тусламж үйлчилгээг үзүүлэхийг даалгасан байна. 

Тус төвийн хамгаалагч, “Хүмүүс сандралдаж эхэлсэн. Гэтэл цахилгаан шатнууд ажиллаад байсан. Галын дохиолол ажиллахгүй. Дохио ч байхгүй, ус ч цацахгүй байсан. Саяхан л манай төвийг шалгаад байсан. Миний мэдэхээр гал гарах үед цахилгаан шат шууд зогсох ёстой.

Гэтэл ажиллаад л байсан нь галын дохиолол ажиллаагүйтэй холбоотой байх гэж ойлгосон. Бүгд хашгиралдаад л, гүйлдээд л байсан. Би шууд л хүүхдүүдийг аврахаар явсан. Би зүгээр л тааралдсан хүүхэд болгоноо л татаж гаргаад байсан. Хэдэн хүүхдийг гаргаснаа мэдэхгүй байна. 10 уу, 15 уу сайн мэдэхгүй байна. Зүгээр л амьсгалж чадахаа болих хүртлээ хүүхдүүдийг татаж гаргасан.” хэмээн ярьсан байна.

Галын улмаас нийт 84 хүн хохирсон ба тэдгээрээс 37 нь амиа алдсан байна. 47 иргэнд эмнэлгийн тусламж үйлчилгээ үзүүлж байгаа ба сураггүй алга бологсдын тоо 64 хэвээр байна.

Нурангин доогуур ч олон арван хүн байх магадлалтай гэж үзэж байна.