УИХ-ын намрын чуулган эхэллээ. УИХ-ын дарга М.Энхболдын баталсан намрын чуулганаар хэлэлцэх асуудлын жагсаалтад нийт 24 хуулийн төсөл багтсан байна. Тэдгээрийн дундаас хамгийн их анхаарал татаж буй нь 2015 онд УИХ-аар баталсан Сонгуулийн тухай хуулийг гурав задалсан сонгуулийн шинэ хуулийн төсөл. СЕХ одоо мөрдөж буй Сонгуулийн тухай хуулийг Ерөнхийлөгчийн сонгуулийн тухай, УИХ-ын сонгуулийн тухай, Аймаг, нийслэл, сум дүүргийн ИТХ-ын сонгуулийн тухай гурван хууль болгон задалжээ.
Тодруулбал, УИХ-ын сонгуулийн тухай хуулийн төслийн 85.3-т “Орон гарсан УИХ-ын гишүүний бүрэн эрхийн хугацаа дуусахад нэг жил хүрэхгүй хугацаа үлдсэн бол орон гарсан суудлыг нөхөхгүй” гэсэн заалт шинээр оруулжээ. Үүнтэй адил заалт өмнөх хуульд бас байсан. “УИХ-ын бүрэн эрхийн хугацааны 3/2 нь өнгөрсөн тохиолдолд орон гарсан тойрогт нөхөн сонгууль явуулахгүй” гэсэн хуулийн заалтыг 2015 оны Сонгуулийн хуулиар өөрчилсөн байдаг. УИХ-ын сонгуулийн тухай хуульд эргэн орж ирсэн энэ заалт зарчмын хувьд буруугүй боловч хэрэв хууль батлагдвал Хэнтийн сонгогчид парламентын бүрэн эрхийн хугацааны тэн хагасыг хууль тогтоох байгууллагад өөрсдийн төлөөлөлгүй үдэх нь байна.
Тиймээс УИХ 42-р тойрогт нөхөн сонгууль явуулах тухай УИХ-ын тогтоолыг түдгэлзүүлсэн Цэцийн дунд суудлын дүгнэлтийг УИХ яаралтай хэлэлцэж, ирэх оны зургадугаар /25-ны дотор/ сард багтаан сонгуулийн товыг шинэчлэн тогтоох ёстой байв. Харамсалтай нь УИХ-ын даргын баталсан хэлэлцэх асуудлын жагсаалтад Үндсэн хуулийн Цэцийн дүгнэлт багтсангүй. Түүгээр ч барахгүй УИХ-ын даргын захирамжаар байгуулсан СЕХ-ны ажлын хэсэг “Гишүүний бүрэн эрхийн хугацаа дуусахад нэг жил хүрэхгүй хугацаанд орон гарсан суудлыг нөхөхгүй” гэдэг хууль оруулж ирсэн нь эрх барьж байгаа нам энэ сонгуулиас цаг үргэлж зугтаж байгаа мэт харагдуулж байна. Гэвч гишүүн Д.Гантулга сонгуулийн бүрэн эрхийн хугацаа дуусахаас хоёр жилийн өмнө чөлөөлөгдсөн байх тул нөхөн сонгууль явуулахгүй байх нь ч бас хууль зөрчсөн хэрэг болно.
Б.ЗАЯА
