Хятадад 2012 онд Ши Зиньпиний эхлүүлсэн авлигыг таслан зогсоох нийт үндэстний кампанит ажил үргэлжилж, улам чангарч байна. Зургаан жил өнгөрсний дараа Бээжин үр дүнгийн талаар мэдээлэл хийж, энэ ажлын дүнд 1 сая 300 мянган түшмэл, үүний дотор 76 сайд байсан хүний хэрэг шалгагдаж байгааг дуулгалаа. Шүүмжлэгчид Ши Зиньпин болон түүний багийг хувийн өс хонзон бодсон хэрэгт буруутгаж байгаа аж.
Гэвч Хятадын дээд шатны удирдагчид эсрэгээр авлигатай хийж буй тэмцэл амжилттай болох эсэхээс нэг намын засаглал хэвээр үлдэх эсэх нь шууд хамаарна гэж үзэж байна. Хятадад албан тушаалын хэрэгтэй Коммунист намын сахилгын хороо, Нийт үндэстний хянан шалгах хороо гэсэн хоёр байгууллага тэмцдэг.
Авлигын эсрэг кампанит ажлын эхний жилүүдэд нам хяналт тавьдаг байсан. “Шуангуй” нэртэй систем бий болж, сэжигтэй хүмүүсийг урт удаан хугацаагаар шоронд суулгаж, хэргээ сайн дураараа хүлээхийг нь хүлээдэг байсан. Энэ хүн хайчсаныг хэн ч, тэр байтугай төрөл төрөгсөд нь хүртэл мэддэггүй байсан бөгөөд шоронд орсон хүн шүүх хурлаар ялаа сонсохоор л олны өмнө гарч ирдэг байжээ.
Ши Зиньпинийг Засгийн эрхэнд гарч ирэхээс өмнө Хятадын эрх баригчид авлигачдыг олны өмнө шийтгэхийг илүүд үздэг байж. Жишээлбэл, Хятадын эрүүгийн хуулинд цаазаар авах ял оноодог 45 зүйл анги байна. Ху Жинтао, Зянь Земиний үед Хятадад цаазаар авах явдал элбэг байсан ч Ши Зиньпиний үед авлигачдыг шийтгэх арай өөр дүрэм журамтай болжээ. 160 сая долларын авлига авсан Люйлян хотын захирагчийг буудан хороосон байна. 2016 онд Хятадын эрх баригчид 463 мянган доллараас дээш үнийн дүнтэй хохирол учруулсан бол цаазаар авч байхаар болжээ.
