Эрдэнэт үйлдвэрийн Тэргүүн дэд захирал асан Б.Шинэбаатарыг АТГ-ынхан баривчилжээ. Өнөөдөр АТГ-аас мэдээлэл хийх үеэрээ Эрдэнэт үйлдвэрийн Тэргүүн дэд захирал, албан тушаалтнууд нь албаны эрх мэдлээ урвуулан 2016 оны аравдугаар сард нэр бүхий аж ахуйн нэгж, хуулийн этгээдэд давуу байдал олгож Хөгжлийн банкны барьцаанд байсан хоёр ширхэг Belaz 75131 маркын машиныг зах зээлийн бодит үнээс өндөр үнээр худалдан авч төрийн өмчид 1 тэрбум төгрөгийн хохирол учруулсан гэм буруутай байж болзошгүй талаар мэдээлсэн.

Энэ үйлдэл нь хэрэг бүртгэлтийн ажиллагаа явуулж дуусган Эрүүгийн хуулийн тусгай ангийн 22.1.2 дахь хэсэгт зааснаар яллагдагчаар татах санал хүргүүлсэн байна.

2016 оны долдугаар сарын 20-нд “Эрдэнэт” үйлдвэрийн ТУЗ хуралдаж Б.Шинэбаатарыг Тэргүүн дэд захирлаар томилж байжээ. Түүнийг Эдийн засгийн хөгжлийн яамны төрийн нарийн бичгийн даргын албыг хашиж байх үедээ “Чингис”, “Самурай” бондын хөрөнгийг улсад үр ашиггүй зарцуулсан гэх үндэслэлээр хэрэгт үүсгэн гадуур мөрдөн байцааж байсан удаатай.