Он гарсаар хоёр Солонгосын тэргүүнүүд  гурав дахь удаагаа нүүр тулан уулзах гэж байна.

Өмнө нь энэ оны 4 болон 5-р сард хоёр улсын хилийн бүсэд болсон бол, гурав дахь удаагийн уулзалт өнөөдөр Хойд Солонгосын нийслэл Пхеньян хотноо болно. Энэ удаагийн ажлын айлчлалын үеэр Солонгосын хойгийг цөмийн зэвсэггүй бүс болгох асуудлыг голчлон хэлэлцэх аж. БНСУ-ын Ерөнхийлөгч Мүүн Жэ Ины БНАСАУ-д хийх айлчлалын талаар Хөх Ордонд мэдээлэл хийжээ.

БНСУ-ын Ерөнхийлөгчийн ажлын албаны төлөөлөгч Им Жон Сок “Саяхныг хүртэл Солонгосын хойгийг цөмийн зэвсэггүй бүс болгох асуудал зөвхөн Хойд Солонгос болон Америкийн Нэгдсэн улс хоорондын асуудал байсан. Одоо тус асуудал голлох байр суурь эзэлж байна. Энэ асуудлыг зүгээр ажлын уулзалтаар хэлэлцэх боломжгүй. Ажлын уулзалтаар хэлэлцсэн ч, аливаа гэрээ хэлцэл байгуулах боломжгүй” гэдгийг тэмдэглэлээ.

Ингэснээр Хөх ордны тэргүүний энэ удаагийн Пхеньянд хийх ажлын айлчлалын хүрээнд бүс нутгийн цөмийн зэвсгээс ангижруулах талаар ямар нэгэн гэрээ хэлцэл байгуулахгүй гэдгийг илэрхийлсэн юм.

Хоёр Солонгосын дээд хэмжээний уулзалт БНАСАУ-ын нийслэл Пхеньян хотноо 18-20-ны өдрүүдэд болно.

БНСУ-ын Ерөнхийлөгч Мүүн Жэ Ин шууд нислэгээр Пхеньян хотноо хүрэлцэх очих гэнэ. Yonhap агентлагийн мэдээлснээр, Samsung Electronics, Hyundai Motor Group, SK Group болон LG Group зэрэг Өмнөд Солонгосын томоохон компани, корпорацийн төлөөлөгчид, улстөр, урлаг, спорт, соёлын салбарын нийт 52 хүнтэй баг оролцох аж.

Ням гарагт Өмнөд Солонгосын төрийн алба хаагчид, сэтгүүлчид, туслах ажилтан нийлсэн 93 хүнээс бүрдсэн баг уулзалтын бэлтгэл хангахаар Пхеньяныг зорьсон.

БНСУ-ын Ерөнхийлөгч Мүүн Жэ Ин, БНАСАУ-ын удирдагч Ким Жон Ун нарын анхны дээд хэмжээний уулзалт энэ оны 4-р сарын 27-нд хоёр улсын хилийн Панмунжом хотод болсон. Эхний уулзалтаас нэг сарын дараа мөн л хилийн бүсэд хоёр дахь удаагаа уулзаж, хоёр улс хоорондын харилцааг тогтмолжуулахаар тохиролцсон юм. Ингэснээр гурав дахь удаагийн уулзалтаас өмнө өнгөрсөн долоо хоногт хоёр улсын хилийн Кэсон хотноо “Зохицуулах товчоо” нээгдэж, Хойд болон Өмнөд Солонгос улс тогтмол харилцаа холбоотой болсон юм.