Монголын анхны кроссфит клуб болох "976 CrossFit Mongolia клуб"-ын үүсгэн байгуулагч, багш, дасгалжуулагч Б.Ундралбаттай ярилцлаа. Тус клуб зургадугаар сарын 18-нд Үндэсний цэцэрлэгт хүрээлэнд кроссфитын спортыг олон нийтэд танилцуулах зорилгоор "976 Mongolian Throwdown 22” тэмцээнийг зохион байгуулах юм.

-Кроссфит бол спортын харьцангуй шинэ төрөл. Хичээллэдэг залуучууд бас нэлээд байдаг боловч олон нийт тийм ч сайн мэддэггүй. Тийм учраас энэ спортын онцлогийг танилцуулахаас ярилцлагаа эхэлье гэж бодож байна?

-Энэ спорт хүний хүч тэнхээ болон тэсвэр тэвчээрийг сайжруулахад чиглэгдсэн олон үүрэгтэй дасгалын систем юм. Нэгэн зэрэг олон булчинг зэрэг ажиллуулна. Товчхондоо кроссфит бол эрүүл мэнд ба фитнессийн гол үндэс юм. Кроссфит нь аюулгүй, үр дүнтэй дасгал хөдөлгөөн болон зөв хооллолтоос бүрдсэн эрүүл амьдралын хэв маяг бөгөөд эрүүл  мэндээ сайжруулах, илүүдэл жингээ хасах, биеийн чадамжаа дээшлүүлэх зэрэг бүхий л зорилгыг биелүүлэхэд туслах үүрэгтэй. Кроссфит нь байнга өөрчлөгдөх олон янз төрлийн идэвхитэй хөдөлгөөнүүдийг өндөр ачааллаар, богино хугацаанд гүйцэтгэдэг спортын төрөл. Мөн хамгийн чухал нь хүний байгалийн өгөгдөл буюу амьд үлдэх чадварыг хөгжүүлдэг, түүнийг дэмждэг. Кроссфит нь өргөх, татах, түлхэх, шидэх, чирэх, гүйх, сэлэх, үсрэх болон авирах зэрэг амьдралд ойр чухал чадваруудыг зэрэг хөгжүүлэхээс гадна баг хамт олны уур амьсгалыг бий болгодог. Нас, хүйс, биеийн онцлог, мэргэжлийн тамирчин, мэргэжлийн бус бүх хүн хичээллэх боломжтой олон нийтийн нөхөрсөг спорт. Мөн олимпийн хүндийн өргөлт, спортын гимнастик, хөнгөн атлетик, пауэрлифтинг гэх мэргэжлийн спортуудын элементүүдийг өдөр бүрийн бэлтгэлдээ ашигладаг нь хичээллэж байгаа хүнд олон талын чадварыг зэрэг, хүртээмжтэй энэ тэнцүү хөгжүүлэхэд тусалдаг.

-Энэ спорт хаана, хэзээ үүссэн бэ. Хэр өргөн тархсан бэ?

-Кроссфит бол 2000 онд АНУ-д дасгалжуулагч Грег Глассман болон Лаурен Женай нарын үүсгэн хөгжүүлсэн спортын нэгэн төрөл. 2022 оны байдлаар Дэлхийн 160 гаруй улсад 15000 гаруй албан ёсны кроссфит клуб байдаг бөгөөд эдгээр клубт 35000 гаруй мэргэжлийн дасгалжуулагч ажиллаж байна. Энэ нь нэг клубт дунджаар 2 дасгалжуулагч байгаа гэсэн судалгаа юм. Хичээллэдэг хүн маш их гэсэн үг.

-Кроссфитээр хичээллэснээр ямар чадварууд суудаг бол?

-Энэхүү спорт нь эрүүл чийрэг биеийн үндсэн 10 чадварт сургадаг. Зүрх судас, амьсгалын тогтолцоо, тэсвэр, чадал, уян хатан чанар, хүч, хурд, зохицуулалт ба хяналт, авхаалж, тэнцвэр, оновчтой байдал ба нарийвчлал гэх мэт.

-Энэ спортыг Монголд оруулж ирж жинхэнэ утгаар нь хөгжүүлж байгаа клуб нь танайх юм байна. 976 CrossFit Mongolia клубынхээ тухай танилцуулаач?

-Бид 2018 онд анх үйл ажиллагаагаа эхлүүлэн, бэлтгэл ажлаа хангаснаар 2019 онд кроссфитийн албан ёсны эрх “Affiliated CrossFit” бүхий анхны клубийг Монголдоо үүсгэн байгуулах олон улсын эрхийг авсан. Ингэснээр кроссфитийн албан ёсны эрх бүхий үйл ажиллагаа явуулах эрхтэй 177 дахь улсаар Монгол Улс бүртгэгдлээ. Улмаар дэлхийн тамирчидтай адил форматаар дасгал сургуулилт хийх, хамтдаа хөгжих, дэлхийн албан ёсны нээлттэй тэмцээнүүдэд оролцох зэрэг олон эрх үүссэн байна. Олон улсад хүлээн зөвшөөрөгдөх мэргэжлийн CrossFit Level 1 Trainer зэрэглэлтэй багш дасгалжуулагчдийн хамтаар “CrossFit Inc”-ийн албан ёсны эрхтэйгээр үйл ажиллагаа явуулж байгаа. 976 кроссфит клуб нь одоогоор гурван CF Level-1 дасгалжуулагчтайгаар, идэвхтэй 250 гаруй гишүүнтэйгээр үйл ажиллагаагаа явуулж байна.

-Үндэсний цэцэрлэгт хүрээлэнд болох “976 Mongolian Throwdown 22” тэмцээний талаарх сонирхуулъя?

-Энэ сарын 18-ны өдөр зохион байгуулах гэж байгаа юм. Монгол Улсад тус спортыг сонирхогч, хичээллэгч залуусаас урилгаар 50 шилдэг тамирчин өрсөлдөх гэж байна. Уг тэмцээнийг кроссфит спортын төрлийг олон нийтэд таниулах, Монгол тамирчдын чансааг ахиулах зорилготойгоор зохион байгуулж байгаа. Тэмцээнд кроссфитийн шилдэг 50 тамирчин эрэгтэй RX, эмэгтэй RX, эрэгтэй 35+ RX гэсэн үндсэн гурван ангилалд өрсөлдөх юм. Мөн урилгаар ОХУ-ын тамирчид оролцоно. Тамирчид нийт 12 минут, 20 минут болон 55 минутын 3 удаагийн гараагаар олон төрлийн дасгалын хослолоос бүрдсэн сорилтуудыг гүйцэтгэж өрсөлдөнө. Мөн анх удаа 3.6 метрийн өндөр 16 метрийн урттай, олон үйлдэл гүйцэтгэх боломжтой буюу суниалт, олс авиралт, цагираг болон хүндийн өргөлтийн сууриар ашиглаж болох төхөөрөмжийг “X-Meta Foundation”-ийн тусламжтайгаар хамтран бүтээж “Үндэсний цэцэрлэгт хүрээлэнд” спорт сонирхогч залууст зориулан нийтийн хэрэгцээнд үнэ төлбөргүй хандивлана гэдгээрээ онцлогтой.

Эх сурвалж: Time.mn