Ардчилсан намын ээлжит хэвлэлийн хурал өнөөдөр боллоо.

Энэ үеэр Ардчилсан намын ерөнхий нарийн бичгийн дарга Ч.Өнөрбаяр "2022 оны Тавдугаар сарын 29-ны өдөр Үндэсний аюулгүй байдлын зөвлөлийн 30 жилийн тохиох гэж байна. Гэвч энэ 30 жилийн босгон дээр Монгол улс ҮАБ-ын цоо шинэ сорилт бэрхшээлтэй тулгарч байна. Харамсалтай нь эрх баригчид баярын хурал л хийх гэж байна. Бидний зүгээс ҮАБ-ын асуудлаар Ерөнхийлөгчтэй уулзая гэж хүсэлт тависан. Хүлээн авсан байна. Гэхдээ энэ уулзалтыг яаравчлах хэрэгтэй. Монгол улсын нэг том асуудал бол "хүний эрх, хууль дээдлэх". Харамсалтай нь УИХ, Засгийн газрын бодлого үүний эсрэг явж байна. 

Эрүүгийн хэрэг хянан шийдвэрлэх тухай хуульд оруулж байгаа нэмэлт өөрчлөлтийг УИХ ирэх долоо хоногт хэлэлцэх эсэхийг хэлэлцэнэ. Хүний эрхийг улам бүр нухчин дарах хумих чиглэл рүү манай улсын хууль зүйн бодлого чиглэх гэж байна.

Ц.Нямдоржийн шоронжсон хууль гээд Эрүүгийн болон Эрүүгийн байцаан шийтгэх гээд хэсэг багц хуулийг нэрлэдэг байсан. Энэ хуулиас салж байна гэж ойлгосон чинь буцаад Х.Нямбаатараар дамжаад амилах гэж байгаа юм байх даа. Х.Нямбаатар Ц.Нямдоржийн шинэ дүр болж хувирах гэж байна. 

Мөрдөгч, прокурорын зөвшөөрөлгүйгээр хүнээс мэдүүлэг байцаалт авдаг болох гэж байгаа. Шүүгчийн зөвшөөрөлгүйгээр мөрдөгч нь хүнийг албадан ирүүлдэг болно. Энэ бол аюул. Мөрдөн байцаах үйл ажиллагаа прокурорын хяналтад байх ёстой. Прокурор өөрийнхөө ажлыг хөнгөлөхийн тулд, шүүх өөрийн зовлонг нимгэлэхийн тулд хууль хийдгээ болъё. Шүүгч, прокурор, мөрдөгч хууль хийдэг тогтолцоо байдаггүй юм. 

Хууль зүйн сайдад хариуцлагатай хандаж Эрүүгийн хэрэг хянан шийдвэрлэх хуулиа "татаж ав" гэж хэлмээр байна. Ц.Нямдоржоос илүү харанхуй, хүний эрх, эрх чөлөөг нугчин дарсан гэж хэлүүлэх болно.

Үндэсний аюулгүй байдлын асуудлаар зөвлөлдөх цаг нь болсон. Хүний эрх чөлөө аюулд ороод байна. Үндэсний аюулгүй байдлын ажлын хэсэг баярын хурал хийдэг бүтэц болж хувирлаа" гэлээ.