Улаанхуаранд байрлалтай цэргийн ангид энэ сарын 6-нд ноцтой осол гарч, хоёр алба хаагч бэртсэн талаарх мэдээлэл бий. Тодруулбал, цэргийн 017 дугаар ангийн 22 настай албан хаагч шөнийн цагаар ажиллаж байхдаа дээврээс унаж, тархи нь бяцарсан байна.

Энэхүү үүссэн нөхцөл байдлын талаар хохирогчийн эгч Х.Мөнхцэцэгээс тодрууллаа.

-Одоогийн байдлаар (уржигдар) дүүгийн тань биеийн байдал ямар байна вэ? Цэргийн ангийн барилга дээр илүү цагаар ажиллаж байгаад шөнө осол гарсан гэв үү?

-Дүүг маань хариуцаж байгаа эмч нь саяхан гарч ирээд найдваргүй болсон гэдгийг бидэнд хэлсэн. Хариуцсан эмч нь хэлэхдээ, одоо зүрх нь зогсохыг хүлээнэ л гэж байна лээ. Мэдээж бидний зүгээс маш их гомдолтой байгаа. Энэ том болсон дүүгээ ингээд харамсалтайгаар алдах гээд байж байна. Одоогийн байдлаар дүүгийн минь амь настай хамааралтай энэхүү хэргийг цагдаа нар шалгаж байгаа.

-Тухайн цэргийн ангиас нь хамгаалалтын хувцас тавьж өгөөгүй асуудал байгаа юм уу? Чухам юу болсон юм бол?

-Өндрөөс унаж бэртэхээс сэргийлсэн хамгаалалтын бүс байгаагүй. Түүнчлэн толгойдоо хамгаалалтын малгайтай байсан бол дүүгийн минь амь наснаас наана тусах байлаа. Тэгсэн бол өрөөл татанхай байсан ч бид нар өнөөдөр баярлаад сууж байхаар байна. Дүү маань энэ газар ажиллаад жил гаруй хугацаа өнгөрсөн. Барилгын цэргийн анги алба хаагчдаа дандаа илүү цагаар ажиллуулдаг. Ажлын цаг нь орой 18:00-19:00 цагийн үед л тарах ёстой шүү дээ. Гэтэл шөнийн 00:00-01:00 цаг хүртэл ажиллуулж байгаад л ийм осол гарчихаж байгаа юм.

Ямар ч хөдөлмөр хамгаалах хэрэгсэл, бэхэлгээ юу ч байхгүй дээвэр дээр шөнийн 23:00 цаг хүртэл ажиллуулж байлгасан хүмүүсээс нь би хариуцлага нэхнэ. Би хөлөө хүрэх газраа явна л гэж бодож байгаа. Чухам ямар хүний буруугаас болоод ийм нөхцөл байдал болов гэдгийг нь мэдэхгүй байна. Тэгэхээр тэрийг л мэдэж авмаар байна. Ямар дарга нь шөнийн 23:00-00:00 цаг хүртэл ажиллах тушаал өгсөн гэдгийг олж мэдээгүй байгаа.

-Тус цэргийн ангийн дарга нартай уулзсан уу, тэдний зүгээс хариу тайлбар хэлсэн үү?

-Өчигдөр орой (наймдугаар сарын 6-нд) хариуцаж байсан инженер нь харагдаж л байсан. Одоо чухам яахаа мэдэхгүй байна.

-Тэгэхээр гомдол саналаа хэнд гаргахаа мэдэхгүй байгаа гэсэн үг үү?

-Ингэнэ гэж даанч бодсонгүй. Энэ зуны саруудад ачаалалтай ажиллаж байгаа юм байна гэдгийг нь хараад л байсан.

Тэр болгонд нь төрийн албан хаагч юм чинь дээрээсээ тушаал аваад л ажилладаг юм байх даа гэж бодоод л яваад байлаа. Залуу хүн ажлаа сайн хий гэж шахна уу гэхээс боль гэж хэлж үзсэнгүй. Манай дүү ажилдаа дуртай, жил гаруй ажиллах хугацаандаа хагас бүтэн сайн өдөр ч алгасалгүй ажиллаж байсан.

-Тэгэхээр илүү цагаар ажиллахаас гадна амралтын өдрүүдэд ч ажилладаг байжээ?

-Ерөнхийдөө шөнийн 01:00-02:00 цаг хүртэл байнга л ажиллуулдаг. Амралтын өдрүүдэд ч хүртэл ажиллуулдаг. Тэгсэн мөртлөө сард 600 мянган төгрөгийн цалин л өгдөг. Энэ бол зөвхөн нэг ар гэрт тохиолдож буй зовлон биш.

Манайд сүүлийн 20, 30 жил оршин тогтносон үйл явц болохоор нэг их сонин сонсогдохгүй байгаа байх. Тэгсэн мөртлөө өчнөөн хүмүүсийн амьдралыг асуудалд оруулж байгаа шүү дээ. Үгээ хэлж чадахгүй доод тушаалтай цэргийн албан хаагч өчнөөн байгаа. Дарга илүү цаг ажилла гэвэл тушаалыг нь л дагадаг. Тэр дарга цэрэг нь ингэж осол гардгийг мэддэг ч юм уу, үгүй ч юм уу.

Энэ асуудлыг хэлж ярьж л байхгүй бол сайхан залуучууд амь насаа алдах эрсдэл байна. Ингэж хүний хөдөлмөрийг мөлжиж болохгүй шүү дээ.

Эх сурвалж: Өдрийн сонин