МҮОНРТ-ийн захирлаар томилогдсоноосоо хойш ердөө сарын дараа ажлаа хүлээлгэж өгсөн Н.Дэмбэрэл тус байгууллагыг тамгыг хамгийн богино хугацаанд барьсан хүнээр тодорсон билээ. Түүний дараа МҮОНРТ-ийн захирлаар томилогдсон сэтгүүлч А.Бүрэнбаатар ч гэсэн өөр нэгэн "номинацид" нэрээ үлдээхүйц содон нэгэн бололтой.

А.Бүрэнбаатарын хувьд Өвөрхангайн фракцид багтдаг, Шадар сайд С.Амарсайханы нэр нөлөөгөөр МҮОНРТ-ийн захирлаар томилогдсон тухай улс төрийн хүрээнийхэн болон тус байгууллагын уран бүтээлчид ярьдаг. Шинэ захирал ч гэсэн "дүрмийн дагуу" ивээн тэтгэгчдээ өрөө төлж эхэлсэн бололтой. Бүр тодорхой хэлбэл, Шадар сайдын эхнэр, нэвтрүүлэгч Ч.Ичинхорлоог тус байгууллагын дэд захирлаар ажиллуулахаар захирлуудын зөвлөлд нэрийг оруулсан юм байна. 

Ч.Ичинхорлоогийн хувьд МҮТВ-д 20 гаруй жил ажилласан, телевизийн нүүр царай болсон нэвтрүүлэгчийн хувьд удирдлагын багт багтах ёсгүй гэх шалтгаан байхгүй ч яг өнөөдрийн нөхцөлд төрийн өндөр албан тушаал хашиж буй нөхрөө дөрөөлж албан тушаалд очих нь жаахан ёс зүйгүй л харагдана. Тэр тусмаа хэдхэн хоногийн өмнө болсон нэг явдал гэр бүлийн хоёрын нэрийг хоёуланг нь доош нь татаж байгаа энэ үед.

Бүр тодорхой хэлбэл, Монгол Улсын Шадар сайд, УОК-ийн дарга С.Амарсайханы эхнэр, нэвтрүүлэгч бүсгүй ХӨСҮТ-ийн улаан бүсэд нэвтэрч, коронавирусын халдвараар тус эмнэлэгт эмчлүүлж байгаа аав, ээждээ эргэлт өгсний дараа тусгаарлалтанд орохоос татгалзаж, эмч ажилчдын шаардлагыг эсэргүүцэж, халдвар хамгааллын дэглэмийг зөрчин шууд гарч явсан тухай мэдээлэл олон нийтийн сүлжээгээр цацагдаж, нийгмийн зүгээс багагүй бухимдал үүсгэсэн.

Мэдээлэл цацагдсаны дараа Шадар сайд С.Амарсайхан мисс эхнэрийнхээ өмнөөс тайлбар хэлж, уучлал гуйсан авч нэвтрүүлэгч бүсгүй өнөөдрийг хүртэл өөрийн биеэр гарч ирээгүй. 

Иргэд, олон нийтийн нэвтрүүлэгч бүсгүйн энэ үйлдлийг улстөрчийн гэр бүлийн хувьд ч, УОК-ийн даргын эхнэрийн хувьд ч ёс зүйгүй үйлдэл хэмээн үзэж, ядаж үзэгчдээсээ уучлал гуйх, тодорхой хугацаанд эфирт гарахгүй байхыг шаардсан авч хариуд нь Үндэсний телевизийн сэтгүүлч, ажилтнуудыг дайчлан өөрийгөө өмгөөлж хамгаалсан баахан сэтгэгдэл, пост бичүүлээд өнгөрсөн байдаг. 

Тийм учраас хэрвээ захирлуудын зөвлөл Ерөнхий захирлынхаа саналыг сайшаан Ч.Ичинхорлоог дэд захирлаар томилсон тохиолдолд өмнө болсон явдлаас болж нэр хүнд нь навс унаад буй байгууллагын нэр хүнд улам л уруудах нь тодорхой. 

Өөр бас нэг цочирдмоор мэдээлэл гэвэл ажлаа аваад сар гаруй болж буй Ерөнхий захирал өөрийнхөө ажлын өрөөнд бөөгийн засал хийлгээд зогссонгүй заслын идээг ажилчдынхаа хоолонд хийх гээд бүтэлгүйтжээ. Аз бол байгууллагын тогооч нар Ерөнхий захирлын өгсөн бурмыг ажилчдын хоолонд хийхээс татгалзаж, тогоо шанагаа шидлэн эсэргүүцэж зогсоосон ч үүнээс болоод МҮОНРТ-ийн уран бүтээлчид, ажилчид нь хэдэн өдрөөр хоолны газраараа үйлчлүүлээгүй... 

Гэх мэтчилэн ажлаа аваад удаагүй байгаа шинэ захирлыг тойрсон дуулиан шуугиан тасрахгүй, сониуч нэгнийг уйдаахгүй бололтой. Уйдаахгүйгээс гадна ухамсарлах ёстой нэг зүйл бол МҮОНРТ нэг хүний өмч биш. Монгол Улсын нийт иргэдийн төлсөн татвар, төсвийн хөрөнгөөр санхүүждэг олон нийтийн өмчит байгууллага. Бусдыг нь мэдэхгүй ч нэг зүйл тодорхой. Энэ байгууллагыг удирдаж байгаа хүн амин хувийнхаа аваа өгөөг албан тушаалаараа төлөх, мухар сүсгээр ажлаа явуулах хэмжээний ёс зүйтэй, боловсролтой байж бол болохгүй.

Б.ЗАЯА