Эрүүл мэндийн сайд Т.Мөнхсайханаас цөөн зүйлийг тодрууллаа.

-Баянзүрх дүүргийн нэгдсэн эмнэлэгт эмчлэгдэж байсан биеийн байдал маш хүнд, "Ковид-19" халдвартай нэг иргэн нас барсан гэсэн. Энэ талаар тодорхой мэдээлэл өгнө үү?

-Тухайн иргэн коронавирусийн дагалдах оноштой ч цээжний булчин сулрах өвчтэй, амьсгал зүрх судасны даамжирсан дутагдалтай, артерийн даралт ихсэлттэй, чихрийн шинжингийн II зэргийн хэв шинж, элэгний С вирусийн архаг үрэвсэлтэй 76 настай иргэн байсан. Улмаар үндсэн өвчин буюу зүрх судасны дутагдлаар нас барсан гэдгийг Эрүүл мэндийн яамнаас мэдээлсэн. Гэвч Олон улсын байгууллагын статистик мэдээлэлд Монгол Улсад коронавирусийн улмаас нэг иргэн нас барсан гэж бүртгэгдсэн. 

-Түүнээс гадна ЭМЯ-нд халаа сэлгээ хийж эхэллээ гэх шүүмжлэл гарч байна. Ийм хүнд нөхцөлд эрүүл мэндийн салбарт заавал халаа сэлгээ хийх шаардлага байсан юм уу?

-Эрүүл мэндийн яаманд халаа сэлгээ хийж өөрийн хамаарал бүхий хүмүүсээ тавиад байгаа асуудал яригдаад байгаа. Ямар нэгэн байдлаар халаа сэлгээ хийсэн юм байхгүй. 2021 оноос Эм эмнэлгийн хэрэгслийн агентлаг байгуулж байгаа. Энэ бол манай салбарын нэг дэвшил. 

Мөн Эрүүл мэндийн даатгалын бүтэц бүрэлдэхүүн өөрчлөгдсөн. Эрүүл мэндийн зарим байгууллага гүйцэтгэлээрээ санхүүжих болсонтой холбоотойгоор хяналт шалгалт сайн тавих шаардлагатай болсон. Тиймээс бүтцэд өөрчлөлт оруулсан. Засгийн газраас Эрүүл мэндийн яамны бүтэц аравдугаар сард батлагдсан. Шинэ агентлаг гарч байгаатай холбоотойгоор бүтцийн өөрчлөлт хийсэн. 

Миний хувьд хүн халсан, өөрийн ойр дотнын хүнийг ЭМЯ-нд авч ажиллуулсан тохиолдол огт байхгүй. Харин эрүүл мэндийн салбарт ямар өөрчлөлт хийх вэ, үүнд ямар баг хамт олон ажиллавал богино хугацаанд өндөр амжилтад хүрэх вэ гэдэгт бодлогын хувьд анхаарал хандуулан ажиллаж байгаа.

-Халдварыг цурманд орууллаа гэж хөл хориог сулруулсан. Гэтэл Баянзүрх дүүрэг том голомт боллоо. Эрсдэлээ яаж үнэлж байна вэ?

-Цурманд оруулах, коронавирусийг устгах гэдэг хоёр өөр асуудал. Тухайн үед ойрын болон хоёр дахь хавьтлын гурав дахь шинжилгээ дуусаж байсан тул тархалтыг хумьсан гэж үзсэн. Одоо шинэ голомт үүссэн. Цаашид дахиад ганц нэг голомт үүсэх эрсдэл бол бий. Тухай бүрт нь тандан судалж ойрын болон дам хавьтлыг илрүүлж арга хэмжээ авахаар ажиллаж байна. Одоо бид үүссэн голомтыг хумьж, Улаанбаатараас бусад аймаг руу халдвар тараахгүй байх арга хэмжээг авах дээр төвлөрөн ажиллаж байна.