Өнгөрөгч долдугаар сард УИХ Эрүүл мэндийн даатгалын тухай хуульд өөрчлөлт оруулснаар 2020 оны арваннэгдүгээр сараас хөнгөлөлттэй эмийн хүртээмж нэмэгдэж, иргэдэд чирэгдэлгүй болсон билээ.

Хөнгөлөлттэй эм болон эмнэлгийн үйлчилгээ ард иргэдэд хэрхэн хүрч байгаатай УИХ-ын Нийгмийн бодлогын байнгын хорооноос ажлын хэсэг гарч танилцан тулгамдсан асуудлыг шуурхай шийдвэрлүүлсэн байна. Энэ тухай мэдээллийг Байнгын хорооны мягмар гаригийн /2020.12.22/ хуралдаанаараа  сонссон юм.

Дээрх асуудлаар УИХ-ын НББХ-ны дарга М.Оюунчимэгээс тодрууллаа. 

-Хөнгөлөлттэй эмээ бичүүлж авах гэсэн иргэд, өндөр настнууд сар бүрийн эхээр анхан шатны эмнэлгүүдэд зохиомол ачаалал үүсдэг, эмийн сангууд ч дууссан гэдэг шалтгаанаар тэр бүр эмийг нь өгдөггүй чирэгдэл болдог байдал өнөөдөр арилсан уу?

-Ажлын хэсэг Чингэлтэй, Хан-Уул, Баянзүрх, Багахангай,  Налайх дүүргийн эрүүл мэндийн төв болон өрхийн эмнэлгүүд, эмийн сангууд, Эрүүл мэндийн даатгалын газар зэрэг байгууллагуудад ажилласан.

Хууль хэрэгжиж эхэлсэн эхний өдрүүдэд хөнгөлөлттэй эмийн жор бичүүлэх гэсэн хүмүүсийн бөөгнөрөл үүсэх, бичүүлсэн нэг жороор 2 өөр эмийн сангаас эмээ хувааж авах боломжгүй болох, хурууны хээ уншигчийн программ гацах, зарим эмийн сангууд зөвшөөрөл аваагүй гэх шалтгаанаар хөнгөлөлттэй эмээр үйлчлээгүй  зэрэг хүндрэл үүссэн байсан. Эдгээр асуудлыг хугацаа алдалгүй шийдэх үүргийг холбогдох газруудад өгч, арилгуулсан.

Мөн иргэдийн тавьж буй гомдол саналын дагуу нийлмэл найрлагатай зарим эмийг хөнгөлөлттэй эмийн жагсаалтад нэмж оруулснаар жагсаалтыг шинэчлэн 136 нэр төрлийн 522 худалдааны нэршлийн эмэнд 30-70 хувийн хөнгөлөлт үзүүлэх, ховор тохиолдох өвчний улмаас өндөр үнэтэй эм байнга хэрэглэдэг хүмүүс тухайн эмээ хөнгөлөлтөөр авдаг болсон.

-Хөнгөлөлттэй эмийн санхүүжилт, худалдаалах эмийн сангуудын тоо хэр нэмэгдсэн бэ?

-Улсын хэмжээнд ажилладаг эрүүл  мэндийн даатгалын ажилтны тоо 50 байсныг 105 болгож хүний нөөцийг нэмэгдүүлсэн, хөнгөлөлттэй эмийн санхүүжилтийг 10 тэрбумаар нэмэгдүүлж, иргэдийг тэгш хүртээмжтэй хангаж байна. Мөн хөнгөлөлттэй эмийн жорыг 3382 эмч бичдэг байсныг 6500 орчим болгож, хөнгөлөлттэй эм худалдаалах эмийн сангуудын тоог нэмэгдүүлснээр бүх шатлалын улсын болон хувийн 1600 гаруй эмийн сан сарын бүх хоногуудад хөнгөлөлттэй эмээр үйлччилж байна. 

Сар бүрийн эхээр хөнгөлөлттэй эм бичүүлэх гэсэн хүмүүсийн оочер дугаар үүсч, эмийн сангууд ч эм дууссан гээд өгдөггүй, иргэдийг чирэгдүүлж бухимдуулдаг байдал өнөөдөр бүрэн арилсан. 

-Ажлын хэсэг өнгөрсөн долоо хоногт мөн коронавирусийн халдвар авсан эрүүл мэндийн ажилтнуудын нөхцөл байдлын талаарх мэдээллийг цахимаар сонсож байсан. Үүний дагуу ямар арга хэмжээ авагдсан бэ?

-Ажлын хэсэг цаг үеийн бусад асуудалд мөн анхаарал хандуулж ажилласан. Цар тахлын үед эмнэлэг өөрөө халдварын голомт болохоос сэргийлэх шаардлага тулгарч байна. Халдварын голомттой эмнэлгүүдэд ажиллаж буй эмч нарын ачааллыг тэнцвэржүүлэх, анхан шатны нэгж, өрхийн эрүүл мэндийн төвүүдэд халдвар хамгааллын хэрэгсэл дутагдалтай байна.

Нэн ялангуяа улсын болон хувийн эмнэлгүүдийн ариутгал, халдваргүйжүүлэлтийг тогтмол хийж, ажиллах орчны нөхцөл байдлыг сайжруулах тал дээр онцгойлон анхаарах, эрүүл мэндийн цахим үйлчилгээний чанарыг сайжруулах чиглэлээр шуурхай ажиллах чиглэлийг Эрүүл мэндийн яам болон ХӨСҮТ-ийн холбогдох албан тушаалтнуудад өгсний дагуу арга хэмжээ аваад ажиллаж байна. 

Цаашид орлого нь тасарч, татаас авч болзошгүй эрүүл мэндийн даатгалын сангийн үйл ажиллагаанд анхаарах,  хөдөө орон нутгийн иргэд хурууны хээ уншуулж байж хөнгөлөлттэй эм авдаг асуудалд уян хатан хандах, сум, багт эмийн хангалтыг нэмэгдүүлэх зэрэг асуудлаар холбогдох байгууллагатай ярилцаад, шийдвэрлэх шатандаа явж байна.