Хойд  Солонгосын удирдагч Ким Жон Унтай 6 дугаар сарын 12-нд Сингапурт хийхээр товлосон уулзалт хойшилж магадгүй гэж Өмнөд Солонгосын ерөнхийлөгч Мүүн Жэ Интэй уулзсаныхаа дараа АНУ-ын ерөнхийлөгч Дональд Трамп мэдэгджээ. Дээд хэмжээний уулзалт болохгүй байх магадлал тун өндөр болохыг тэрбээр нэмж хэлсэн байна.

Трамп хэдхэн хоногийн өмнө Хойд Солонгосын ааш авир гэнэт өөрчлөгдсөнд сэтгэл дундуур байгаагаа хэлээд үүнд Хятадын ерөнхийлөгч Ши Жиньпин нөлөөлсөн гэж үзэж байгаагаа дахин илэрхийлжээ. Тодруулбал Ким Жон Ун хоёр дахь удаагаа Хятадад айлчилсны дараа бодлогоо өөрчилсөн гэдгийг тэр онцолсон юм.

“Бидэнд тодорхой нөхцөл болзол бий. Энэ нөхцөлүүдийг Хойд Солонгос хүлээж авах боломжтой гэж үзэж байна. Хүлээж авахгүй бол бид уулзахгүй. Хойд Солонгост төдийгүй дэлхий дахины хувьд эерэг нөлөө үзүүлэх уулзалт болох боломж бий. Хэрвээ уулзалт товлосон хугацаандаа болохгүй бол дараа нь болж магадгүй. Агуу улс болох боломж Хойд Солонгост байгаа хэдий ч тус улс одоогийн нөхцөл байдлаасаа салахгүй бол уг боломжийг ашиглаж чадахгүй ч байж магадгүй. Хойд Солонгос боломжийг ашиглах хэрэгтэй гэж би бодож байна” гэж Дональд Трамп хэлжээ. Ингэж хэлэхдээ тэрбээр Хойд Солонгост ямар нөхцөлүүдийг санал болгож байгаагаа дурдаагүй байна.

Дональд Трамп хэрвээ Хойд Солонгос цөмийн зэвсгээсээ салбал Ким Жон Уны аюулгүй байдлыг нь бүрэн баталгаажуулахаа илэрхийлээд Өмнөд Солонгос, Хятад, Япон улсууд асар их мөнгө цутгаж, Хойд Солонгосыг хүчирхэг эдийн засагтай орон болгоход бэлэн байгааг мэдэгдсэн юм.

Трамп, Ким нарын түүхэн уулзалтыг зургаадугаар сарын 12-нд Сингапурт зохион байгуулахаар болсныг тавдугаар сарын эхээр зарлаж байв. Гэвч Солонгосын хойгт явагдаж байгаа АНУ, Өмнөд Солонгосын цэргийн сургуулилалт, цөмийн зэвсгээс салгахдаа Ливийн загварыг хэрэгжүүлнэ гэсэн Трампын зөвлөхийн үг зэргээс шалтгаалан уулзалтад оролцох эсэхэд эргэлзэж байгаагаа Пёньян гэнэт мэдэгдсэн юм.

Холбоотой мэдээ: БНСУ-ын ерөнхийлөгч Мүүн Жэ Ин АНУ-д айлчилж байна