БНСУ-ын ерөнхийлөгч Мүүн Жэ Ин өчигдөр АНУ-ын нийслэл Вашингтон хотноо хүрэлцэн ирснээр түүний АНУ-д хийх 4 өдрийн айлчлал эхэллээ. Түүний энэ удаагийн айлчлал бол ирэх 6-р сард Сингапурт болох АНУ, Хойд Солонгосын дээд хэмжээний уулзалтаас өмнө болж байгаа гэдгээрээ онцлогтой. Трамп, Мүүн Жэ Ин нарын гурав дахь удаагийн дээд хэмжээний уулзалтаар АНУ болон Өмнөд Солонгосын холбоотны харилцааны өргөжин тэлэлтийг дахин нотоллоо хэмээн цагаан ордон мэдээлсэн байна .

Үүнээс гадна өнгөрсөн сарын 27нд болсон Хоёр Солонгосын дээд хэмжээний уулзалтын үр дүнд Солонгосын хойгт гарч байгаа өөрчлөлтүүд дээр илүү ойр хамтын ажиллагаагаа үргэлжлүүлэх талаар мөн Трамп ерөнхийлөгчийг Хойд Солонгосын удирдагч Ким Жон Унтай хийх дээд хэмжээний уулзалтын талаар хэлэлцэх юм байна. Бас нэг голчлон хэлэлцэх асуудал бол АНУ, Өмнөд Солонгосын жил тутам зохион байгуулдаг Макс Тандер нэртэй цэргийн хамтарсан сургуулилт юм. Өнгөрсөн 7 хоногт Өмнөд болон Хойд 2 Солонгосын засгийн газрын түвшний дээд хэмжээний уулзалт товлогдсон байсан ч Пхенян энэ сургуулилтыг өдөөн хатгалга хэмээн үзэж уулзалтыг гэнэт цуцалсан юм.

Мөн энэ цэргийн ажиллагаа нь Солонгосын хойгт энх тайван цогцлох үйл хэргийг хойш чангааж байна хэмээн шүүмжилсэн. Цаашлаад ирэх 6-р сард болох Трамп, Кимийн уулзалтыг цуцалж магадгүй гэдэг байр суурийг илэрхийлээд байгаа юм.

Өмнөд Солонгосын тал Трамп, Кимийн хооронд зуучлахаар шаргуу ажиллаж байгаагаа мэдэгдсэн. Тиймээс Мүүн болон Трамп нарын энэ удаагийн уулзалтаар энэ асуудлыг хэрхэн шийдвэрлэх Мүүн Жэ Ин-ы хувьд АНУ, Хойд Солонгосын дээд хэмжээний уулзалтыг амжилттай зохион байгуулахад гүүр нь болж ажиллах байх хэмээн ажиглагчид харж байна.