ЭМЯ-ны ээлжит мэдээллийн цагаар коронавирусын халдварын нөхцөл байдлын талаар мэдээллээ.

2020 гуравдугаар сарын 23-нд нийслэлийн зургаан дүүргийн эмнэлгүүдээс санамсаргүй түүврийн аргаар 28 хүнээс шинжилгээ авахад коронавирус илрээгүй байна. Уг шинжилгээг уушгины хатгалгаатай хүмүүс коронавирусаар халдварласан эсэхийг тандах зорилгоор хийсэн байна.

Мөн Алтанбулагийн боомтоор орж ирээд Сэлэнгэ аймагт тусгаарлагдсан хоёр, Орхон аймагт тусгаарлагдсан нэг иргэний шинжилгээнээс коронавирус илрээгүй гэв. Өнөөдрийн байдлаар ХӨСҮТ-д 186 хүн тандалт хяналтад байгаа аж. Халдвар илэрсэн өвчтнүүдийн биеийн байдал тогтвортой байна гэв.

ХӨСҮТ-ийн захирал Д.Нямхүү:

-ДЭМБ-аас гаргасан зөвлөмж буюу стандартын дагуу лабораторийн шинжилгээ хийхдээ цэр, хамар, залгиураас арчдас авч, цус буюу ийлдэс, өтгөн, шингэний гээд таван төрлийн шинжилгээ хийж байна. Эмчилгээнд байгаа хүмүүсийн шинжилгээг өдөр болгон протокол хөтөлж, эмчилгээний үр дүнг харьцуулж, хянаж байгаа. Энэ нь эмчилгээ зохиж буй эсэхийг харьцуулан үзэх ач холбогдолтой.

Бүрэн эдгэрсэн хүнийг эмнэлгээс гаргахдаа гурван өдөр дараалан шинжилгээ хийж баталгаажуулаад гаргадаг. Хэрэв дутуу эдгээгээд гарвал халдвар тараах эрсдэлтэй.

Эмнэлэгт 14 хоног тусгаарлагдаад гарч буй хүн гэртээ 14 хоног тусгаарлах ёстой. Эдгээр хүмүүс өөрийгөө битгий хуураарай. Энэ системийг тагнуул, цагдаа, онцгой байдлын байгууллагатай хамтарч хянаж байгаа.

ЭМЯ-ны Эмнэлгийн тусламжийн газрын дарга Я.Буянжаргал:

-Улсын хэмжээнд нэгдүгээр сарын 9-нөөс хойш нийт 3,413 иргэнийг тусгаарлан ажиглалаа. Одоогийн байдлаар 2,083 иргэн ажиглалтад байна. Өчигдөр Жаргалантаас 16, "Асралт мед" эмнэлгээс 13, Дархан-Уул аймагт 26 иргэн ажиглалтаас гарч, гэрийн ажиглалт руу шилсэн.

Харин Баян-Өлгий аймагт дөрөв, Орхон аймагт 40 иргэн ажиглалтад нэмэгдэж орсон байна. Ажиглалтад байсан, одоо байгаа иргэдэд эмчилгээ үйлчилгээ үзүүлж буй 300 эмч, эмнэлгийн мэргэжилтэн бий. 

Тусгаарлан ажиглалтаас гарч байгаа болон нэмж ажиглалтад орж буй хөдөлгөөнтэй холбоотойгоор дээрх эмч нараас Багабаянгаас гурван эмч тусгаарлалтаас гарсан бол Орхон аймагт зургаан эмч, эмнэлгийн мэргэжилтэн нэмж ажиглалтын байр руу орсон.

Гэрийн ажиглалтад шилжиж буй хүмүүст хатуу зөвлөмж өгч байгаа бөгөөд цаашид халдварыг Монгол Улсад нэмж гаргахгүй байх бүх эрсдлийг бид тооцож байна. Ингэхдээ хуулийн болон бусад төрийн байгууллагатай хамтран ажиллана.

Орхон, Дархан-Уул, Дорнод, Ховд аймагт лабораторийн шинжилгээ хийх эмч нарыг сургаж байна

Манай улсын хувьд "COVID-19" халдварын эхний давлагааг амжилттай давсан ч одоо хоёр дахь давлагаанаас сэргийлэх, хэрхэн эрсдэлгүй давж туулах талаар дараах төлөвлөлтүүдийг хийжээ.

Тухайлбал, Ховд, Дорнод аймагт лабораторийн шинжилгээ хийх эмч нарыг ХӨСҮТ дээр бэлдэж эхэлсэн байна. Үргэлжлүүлэд Дархан-Уул болон Орхон аймагт энэ чиглэлээр ажиллах эмч нарыг бэлтгэнэ.

Мөн хүнд амын дунд гарсан халдварын тохиолдлыг харьцуулж, эрсдлийн тооцооллыг хийсний  үндсэн дээр долоон үе шаттайгаар 5,000 орчим ор дэлгэхээр төлөвлөгөжээ. Орнуудыг дэлгэхдээ эмнэлгийн тусламж үйлчилгээний хэвийн байдлыг хадгалахаар тооцоолсон байна. Шаардлагатай тохиолдолд төлөвлөгөөт мэс засал, сэргээн засах эмчилгээг түр хугацаагаар хойшлуулж, хувийн эмнэлэгт шилжүүлэх ажлыг давхар хийж байгаа аж.

ДЭМБ болон бусад орны туршлагаас харахад хөнгөн өвчтөн 14 хоног, хүнд буюу хүндэвтэр өвчтөн 4-6 долоо хоног эмчлэгдэж байна. Харин манайд эмчлэгдэж буй иргэдийн хувьд удаан хугацаанд эмчлүүлэх тооцоололтой байгаа учраас эмийн хэрэгслийн зардал тооцоог хийж байгаа гэв.