Истанбул-Улаанбаатар чиглэлийн тусгай үүргийн нислэг үүрийн 01 цагт Чингис хаан олон улсын нисэх буудалд газардаж, 252 иргэн эх орондоо ирлээ.
Иргэдийг ирсэн даруйд 14 хоног тусгаарлахаар ЗТХЯ, ХӨСҮТ, ОБЕГ, МХЕГ-ын алба хаагчид ажиллав. Мөн зорчигчдын ачаа, тээшийг 14 хоног ариутгасны дараа хүлээлгэн өгнө. Мөн тусгай нислэгийн бүрэлдэхүүнд багтсан мэргэжлийн хяналтын эрүүл ахуй, халдварын хоёр ахлах байцаагч, ХӨСҮТ-ийн нэг эмч, дөрвөн нисгэгч, хоёр инженер, техникийн ажилтан болон есөн үйлчлэгчийг мөн хугацаанд тусгаарлах юм.
Тус нислэгээр Монгол улсад маск үйлдвэрлэх түүхий эд материал болон эмнэлгийн тоног төхөөрөмж, эм тээвэрлэж ирснийг МИАТ компани мэдээлжээ.
Эх орондоо ирсэн 252 иргэнийг эрүүл мэндийн үзлэгт оруулсан бөгөөд халуурсан хүн байгаагүй байна.
-
Энэ сарын 15-нд Сөүл-Улаанбаатар чиглэлийн нислэгээр БНСУ-аас 244 иргэн
-
Энэ сарын 16-нд Берлин, Москвагаас 231, Токиогоос 256 иргэн тус тус ирсэн билээ.
Ийнхүү нийт 983 иргэн эх орондоо ирж, тусгаарлагдаад байна.
Түүнчлэн гадаад улсад зорчиж яваад нутаг буцах боломжгүй болсон монгол иргэдийн өргөдөл, хүсэлтийг харгалзан шаардлагатай тохиолдолд нэмэлт нислэг үйлдэх асуудлыг Засгийн газар, УОК шийдвэрлэх юм. Тиймээс иргэдийг хүлээцтэй байж, ойр байрлах Монгол улсын Элчин сайдын яам болон Консулын газарт хандахыг зөвлөж байна.
