Сингапур АНУ-ын Ерөнхийлөгч болон БНАСАУ-ын удирдагчийн нисэх онгоцыг, мөн эдгээрийг дагалдан яваа нисэх онгоцуудыг “Пайя леба” дахь цэргийн нисэх хүчний бааз дээр буулгахыг санал болгосон байна. Энэ тухай “Страйтс таймс” сонин мэдээллээ.
Ражаратнамагийн нэрэмжит Олон улс судлалын сургуулийн судлаач Билвир Сингх "Цэргийн бааз хот улс гэгддэг Сингапурын зүүн хойд хэсэгт байрладаг. Иймээс аюулгүй байдлын үүднээс яг тохирох газар" гэж үзэж байна. Тэрбээр "Дональд Трамп болон Ким Жон Ун-ыг тойрон хүрээлэгчид аюулгүй байдлыг эн тэргүүнд тавьдаг. Иймээс тэд Сингапурыг уулзалт хийх хамгийн тохиромжтой газар гэдгээр сонгосон. Вашингтон ч тэр Пхеньян ч тэр Сингапур энэ үүргийг 101 хувиар биелүүлнэ гэдэгт итгэлтэй байна. "Чанги" олон улсын нисэх буудал зүүн өмнөд Азидаа хамгийн их ачаалалтайд тооцогддог.
Сингапурын эрх баригчид хоёр орны удирдагчдыг энд хүлээн авахаар болвол аюулгүй байдлыг хангахын тулд нисэх буудлыг удаан хугацаагаар хаах хэрэг гарах юм. Тэгээд ч хоёр орны удирдагчдын нисэх онгоцыг хүлээн авах асуудал Сингапурын зохих ёсны байгууллага болон БНАСАУ, АНУ-ын төлөөлөгчид хооронд маш нарийн яриа хэлэлцээ хийж, яг таг ярьж тохирох асуудлын нэг юм. Бас нэг бэрхшээл бол Хойд Солонгосын төлөөлөгчдийн бүрэлдэхүүний талаарх мэдээлэл маш нууц байна.
Гэлээ ч гэсэн Ким Жон Ун-ыг төрсөн дүү Ким Ё Чон заавал дагалдах нь тодорхой. Ким Жон Ун Сингапурт “Ил-62” онгоцоор ирнэ. Тэрбээр саяхан Даляньд Ши Жиньпинтэй уулзахдаа энэ онгоцоор ирж байсан. Тэгээд ч түүний энэ айлчлал 2011 онд засгийн эрхэнд гарснаас хойш хилийн чанадад нисэх онгоцоор хийж байгаа анхны айлчлал юм. “Ил-62” нисэх онгоц Пхеньянаас Сингапур хүрэх замыг төвөггүй туулна. Хамгийн гол асуудал Ким Жон Ун-ы лимузин машин болон айлчлалд шаардагдах бусад тоног төхөөрөмжийг тээвэрлэх ачаа тээврийн “Ил-76” онгоцонд байна.
Энэ онгоц нэг удаагийн шатахуун цэнэглэлтээр БНАСАУ-аас Сингапур хүрэх 5 мянган километр замыг туулах чадамжгүй. Иймээс энэ онгоц замдаа зайлшгүй нэг буулт хийнэ. Ингэхдээ БНХАУ-ын өмнөд хэсгийн Гуанжоуд эсвэл Вьетнамд бууж шатахуун цэнэглэнэ. Нисэх онгоцны асуудлыг шийдэх онгоц түрээслэх гэсэн хувилбар бий. Мэдээж хэрэг Хятадаас түрээсэлнэ. Гэвч энэ нь боломжгүй зүйл. Нэгдүгээрт, нэр хүндийн асуудал. Ким Жон Ун өөрийн онгоцоор ирснээр улс орныхоо тусгаар тогтнолыг батлан харуулна. Хоёрдугаарт, улс орны аюулгүй байдлын асуудал байна. Хэдийгээр БНАСАУ болон БНХАУ хооронд найрсаг нөхөрсөг харилцаатай ч хойдын тусгай алба удирдагчаа өөр орны онгоцоор тээвэрлэхийг хэзээд зөвшөөрөхгүй нь мэдээж юм" гэжээ.
Эх сурвалж: Монголын мэдээ
