Улсын онцгой комиссын XII дох хуралдаан өнөөдөр боллоо. Хуралдаанаас гарсан шийдвэрийг Шадар сайд, Улсын онцгой комиссын дарга Ө.Энхтүвшин танилцуулав. 

Ө.Энхтүвшин:

-"Баян-Өлгий аймагт өнөөдрийн байдлаар 133 иргэн тусгаарлагдсан. 59 иргэн гэрээр хяналтад байгаа. УОК-ын хуралдаанаар эдгээр хүмүүсийн талаарх тодорхой мэдээллийг авч, холбогдох сайд нарт чиглэл өглөө. 

Монгол Улсад коронавирусийн дөрвөн тохиолдол бүртгэгдээд байна. Франц улсын иргэний биеийн байдал одоогоор тогтвортой байгаа. Эхний үед Францын талаас тусгай онгоц явуулж иргэнээ татаж авъя гэж байсан ч биеийн байдал нь тогтворжиж байгаа учраас энэ яриа зогссон. 

Өчигдөр орой УОК-ын гишүүдэд коронавирусийн халдвар илэрсэн гэдэг мэдээлэл ирсэн. Үүнийг дахин нягтлаад ЭМЯ-наас олон нийтэд мэдээлсэн. Бид гадаадад байгаа иргэдийг татаж авна гэдэг байр суурьтай байгаа. Үүнийг эрсдэлтэй ажил гэдгийг мэдэж байсан. Тийм ч учраас бэлтгэлээ хангасан.

Өнөөдөр тэдгээр хүмүүсийн ойр 750 орчим иргэн байгаа. Тусгаарлагдсан иргэдийг аль болох нэг өрөөнд цөөн хүн байхаар байранд тусгаарласан. Хяналт сайн байгаа. Ойр ойрхон халууныг нь үзэж, оношлоод эмчлэх ажил хийгдэж байна. 

Манай иргэд тайван байх хэрэгтэй. Бид бэлтгэлээ хангасан, хяналтдаа байлгаж байна. Франц иргэн шиг ийш тийшээ яваагүй. Хяналтад байгаа. 

Мөн мэдээллийг зөвхөн УОК-оос авч бай. Буруу, өдөөн хатгасан, мушгисан мэдээлэл коронавирусээс илүү аюултай гэдгийг хэлмээр байна. Халдвар авсан гурван иргэн рүүгээ дайрч, давшилж болохгүй. Тайван байлгах хэрэгтэй. 

Сүүлийн үед коронавирусийн халдвараар улс төрийн хонжоо олох гэсэн оролдлого гаргаж байна. Ингэж болохгүй гэдгийг анхааруулж байна" гэв. 

Мөн сургууль, цэцэрлэгийн үйл ажиллагааг гуравдугаар сарын 30-н хүртэл зогсоосон. Хөл хориог цааш нь үргэлжлүүлэх эсэхийг БСШУЯ-наас санал оруулж ирэх аж. Уг асуудлыг яаралтай шийдэхийг холбогдох яаманд чиглэл өгчээ. 

Одоогоор Өмнөд Солонгосоос ирсэн хоёр иргэний биеийн байдал хэвийн, Берлинээс ирсэн нэг иргэний биеийн байдал хүндэвтэр байгаа гэж ХӨСҮТ-ээс мэдээлжээ.