Өнөөдөр манай улсад шинэ төрлийн коронавирусийн халдвар илэрсэн. Энэ талаар болон цаг үеийн нөхцөл байдлын талаар ЭМЯ-аас мэдээлэл хийлээ.

Одоогоор дэлхийн 109 улсад COVID-19 халдварын нийт 109577 тохиолдол бүртгэгдээд байна.

Энэ үеэр ХӨСҮТ-ийн Тандалт судалгааны албаны дарга А.Амбасэлмаа “Дорноговь аймагт илэрсэн COVID-19-ийн тохиолдол нь гуравдугаар сарын 2-ны өдөр Москва-Улаанбаатар чиглэлийн онгоцоор ирсэн. Гуравдугаар сарын 2-ноос 6-ны хооронд Баянгол зочид буудалд байрлаж байгаад 6-ны орой Улаанбаатар-Сайншанд чиглэлийн галт тэргээр явсан.

Тэнд очсон хойно нь түүний эрүүл мэндийн байдалд нь эмнэл зүйн шинж тэмдэг илэрсэн гэж мэдээлсэн бөгөөд мэдээллийн дагуу түүнийг сэжигтэй тохиолдол гэж үзэн тусгаарлаж, Дорноговь аймгийн мэргэжлийн багийг томилсон. Мөн тухайн иргэнтэй хавьтаж, ойртсон хүмүүсийг илрүүлсэн. Судалгаагаар Улаанбаатар хотод 43 тохиолдол, Дорноговь аймгийн Улаанбадрах суманд ойрын хавьтал болсон 60 хүнийг тусгаарлалтад оруулсан байна. Аймгаас тусгаарласан хүмүүс дээр аймгийн мэргэжлийн баг очиж ажилласан. 

Эхний хавьтлын 123 хүнийг хатуу дэглэмийн тусгаарлалтын бүсэд ажиглалтад авч, ойр ойрхон лабораторийн шинжилгээ хийнэ. Мөн халдвар авсан иргэнтэй нэг онгоцонд явж ирсэн ойрын суудлын хүмүүсийг ч тусгаарлана.

Халдвар авсан хүнтэй ойртсон хүнээс гадна хавьтлын хавьтал гэж гарч ирнэ. Хоёрдогч буюу хавьтлын хавьтлыг бид эхний хавьтлуудын шинжилгээний хариу гартал гэрт нь ажлаас нь чөлөөлөн тусгаарлаж ажиглалтад авна. Энэ ажиглалтад байх хүний тоо урьдчилсан байдлаар 300 орчим байна. Тиймээс маш дэг журамтайгаар ажиглалтад орох хэрэгтэй. Иргэдэд хандаж хэлэхэд, хэрвээ тухайн халдвар авсан хүнтэй 2,3 дугаар хавьтал болсон бол өөрсдийгөө яаралтай гэртээ тусгаарлаж, ажиглалт аван шинж тэмдэг илэрвэл эрүүл мэндийн байгууллагад мэдээлэх хэрэгтэй" гэж хэлсэн юм. Мөн тэрээр Коронавирусийн халдвартай Францын иргэний хавьтлуудаас халдварын шинж тэмдэг илэрсэн хүн өнөөдрийн байдлаар байхгүй гэдгийг хэлсэн юм.