Эрүүл мэндийн яамнаас өнөөдөр 11 цагт ээлжит мэдээлэл хийв.

Мэдээллийн эхэнд ДЭМБ-аас дэлхий дахинаа өнөөдрийн байдлаар COVID-19 вирусийн эсрэг дархлаатай нэг ч хүн байхгүй байгааг анхааруулсныг мэдэгдэв. 

Халдвар тарссан орноос ирж тусгаарлагдсан зарим иргэд дураараа авирлах үйлдэл гаргаж, эмнэлэг, цагдаагийн байгууллагын үйл ажиллагаанд хүндрэл учруулж байгаа талаар хэлэв. 

Тухайлбал "Бага баян" амралтад тусгаарлагдсан Хөвсгөл аймгийн харьяат иргэн Б нь өөрөө эмнэлгийн ажилтан мөртлөө "Бүгдээрээ эндээс гарья" хэмээн бусдыгаа уриалжээ. Мөн Улсын хоёрдугаар төв эмнэлэгт тусгаарлагдсан нэг иргэн тээшиндээ авч ирсэн согтууруулах ундаасаа ууж, жижиг саванд нуун бусад тусгаарлагдсан иргэдэд дамжуулан хэрэглэсэн зөрчил гарсан байна. 

Энэ талаар ЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан "Зарим иргэд аюулт нөхцөл байдлын ухамсарлахгүй өөрийнхөө болон, бусдын амь насыг эрсдэлд оруулж байна. Өнөөдөр эмнэлэг, цагдаа зэрэг бэлэн байдалд ажиллаж буй алба хаагчид халдварын тохилдол нэвтрүүлэхгүйн тулд нойр хоолгүй ажиллаж байна. 

Налайхын нэг иргэн онгоцноос буугаад зугтсан. Итали улсаар дамжин ирсэн Ш, А гэх хоёр иргэн бага насны хүүхэдтэйгээ ирсэн. Эдгээр иргэн явсан газраа тодорхой хэлэхгүй нууж, буруу мэдээлсэн. Зарим иргэн өөр газар тусгаарлагдана гэж эсэргүүцсэн. Энэ мэт иргэд дураараа авирладаг. 

Манай улс хэдий олон талын эрх чөлөөтэй боловч, хүний амьнас эрх, эрх чөлөө хамгийн чухал. Үүргээ биелүүлээгүй иргэдэд дэглэмийн хязгаарлалтын хугацаа дууссаны дараа хуулийн хариуцлага тооцно. 

Бид гарсан зөрчил болгоныг баримтжуулж байгаа. Иргэдийн гаргасан зөрчил болгонтой хариуцлага тооцно. Үүний ард их зардал, олон хүн ажиллаж байгаа. Нэг ч гэсэн иргэнээ халдвар авахуулахгүйн төлөө зүтгэж байгаа алба хаагчдаа хүндэтгэх хэрэгтэй байна" гэлээ. 

ХӨСҮТ-д тусгаарлагдаад байсан дөрвөн иргэнээс COVID-19 вирусийн халдвар илрээгүй байна. Одоогоор тус төвд сэжигтэй нэгтохиолдлыг тусгаарлан хяналт шалгалт шинжилгээ хийж байгаа аж. Мөн "Бага баян" сувилалд нийт 8 хүнийг нэмж ажиглалтад авчээ.